ឯកឧត្តម ឧបនាយរដ្ឋមន្ត្រី កែ គីមយ៉ាន និងលោកជំទាវ ម៉ៅ ម៉ាទ្បៃ បានអញ្ជើញជាអធិបតីក្នុង ពិធីសំណោះសំណាល និងប្រគល់ផ្ទះជូនអតិតយុទ្ធជន នៅតំបន់ដីការ៉េពី ស្រុកភ្នំស្រុក
ខេត្តបន្តាយមានជ័យ៖នាព្រឹកថ្ងៃអង្គារ ៩កើតខែ ជេស្ឋឆ្នាំកុរ ឯកសក័ ព-ស ២៥៦៣ ត្រូវនឹងថ្ងៃទី១១ ខែមិថុនា ឆ្នាំ២០១៩ ឯកឧត្តម ឧបនាយរដ្ឋមន្ត្រី កែ គីមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងលោកជំទាវ ម៉ៅ ម៉ាទ្បៃ បានអញ្ជើញជាអធិបតីក្នុងពិធីសំណោះសំណាល និងប្រគល់ផ្ទះជូនអតិតយុទ្ធជន នៅតំបន់ដីការ៉េពី ស្រុកភ្នំស្រុក ខេត្តបន្ទាយមានជ័យ។
នៅក្នុងពិធីនេះក៏មានការអញ្ជើញចូលរួមពីឯកឧត្ដម គង់ គីម ទេសរដ្ឋមន្ត្រី ជាអគ្គលាខាអតិតយុទ្ធជនកម្ពុជា ឯកឧត្ដម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ លោកឧត្តមសេនីយ៍ទោ អាត់ ខែម ស្នងការដ្ឋាននគរបាលខេត្តបន្ទាយមានជ័យ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ កងពល៥១ ប្រធានមន្ទីជុំវិញខេត្ត និងប្រធាន អនុប្រធាន សមាគមន៍អតិតយុទ្ធជនខេត្តបន្ទាយមានជ័យ។
ថ្លែងនៅក្នុងឱកាសនោះឯកឧត្តម ឧបនាយរដ្ឋមន្ត្រី កែ គឹមយ៉ាន បានមានមតិពាំនាំការផ្ដាំផ្ញើសួរសុខទុក្ខ និងជូនពរពីសម្តេចវិបុលសេនាភក្តីសាយ ឈុំ ប្រធានព្រឹទ្ធសភា,សម្តេចពញាចក្រី ហេង សំរិន ប្រធានរដ្ឋសភា,និងសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ជូនចំពោះអាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធ ពិសេសអតីតយុទ្ធជនទាំងអស់។
ក្នុងនោះឯកឧត្តម ឧបនាយរដ្ឋមន្ត្រី កែ គឹមយ៉ាន បានបន្តថ្លែងការកោតសរសើរ ចំពោះកងកម្លាំងគ្រប់ប្រភេទរបស់ខេត្ត យោធា នគរបាល និងកងរាជអាវុធហត្ថឈរជើង ក្នុងភូមិសាស្រ្ត ខេត្តបន្ទាយមានជ័យ ដែលបំពេញភារកិច្ច តាមតួនាទីបានយ៉ាងល្អ ពិសេសបានចូលរួមចំណែកក្នុងការងារមនុស្សធម៌ ជួយសង្រ្គោះ ជួសជុល-សាងសង់ផ្ទះ សម្រួលដល់ការលំបាក របស់ប្រជាពលរដ្ឋនៅតាមមូលដ្ឋាន។
បន្ទាប់ពីបញ្ជប់នៃពិធីសំណេះសំណាលរួចមកឯកឧត្តម ឧបនាយរដ្ឋមន្ត្រី និងលោកជំទាវ បាននាំយកនូវអំណោយ ចែកជូនរួមមាន៖
១/ជូនគ្រួសារអតីតយុទ្ធជនចូលមករស់នៅក្នុងដីសម្បទានសង្គមកិច្ចចំនួន៨០គ្រួសារ ក្នុង១គ្រួសារទទួលបាន អង្ករ មី មុង ភួយ កន្ទេល ប្រេងឆា ទឹកស៊ីអ៊ីវ ទឹកត្រី អំបិលអ៊ីយ៉ូត សារ៉ុង ចង្រ្កាន ឆ្នាំងដាំបាយ ឆ្នាំសម្លកំសៀវទឹក ចានដែក ចានបាយ ចានសម្ល ស្លាបព្រា សម ពិល និងថវិកា១០ម៉ឺនរៀល។
២/ជូនប្រជាពលរដ្ឋ២៥០នាក់ក្នុង១គ្រួសារទទួលបានសារ៉ុង១ និងថវិកា១ម៉ឺនរៀល។
៣/ជូនប្រជាពលរដ្ឋទទួលបានដីឡូតិ៍ តែមិនទាន់បានសង់ផ្ទះចំនួន២២៩នាក់ ម្នាក់ៗទទួលបានសារ៉ុង១ ថវិកា២ម៉ឺនរៀល
៤/ឧបត្ថម្ភយោធាសឹករងខេត្តកងពលលេខ៥១ កងពលលេខ៤ មួយអង្គភាពៗទទួលថវិកា២លានរៀល។
៥/ឧបត្ថម្ភនគរបាលស្រុកភ្នំស្រុក ពេទ្យស្រុក កងរាជអាវុធស្រុក មួយអង្គភាពៗទទួលបានថវិកា១លានរៀល។
៦/ជួយកសាងផ្ទះជូនបងប្អូនយុទ្ធជនចំនួន៣០៩ខ្នង។
៧/ជួយកសាងផ្លូវចូលក្នុងតំបន់ដីការ៉េ២ ប្រហែល ១០គីឡូម៉ែត្រ។
៨/ជួយកសាងសាលារៀន១ខ្នង មាន៦បន្ទប់។
៩/ជួយកសាងប៉ុស្តិ៍សុខភាព១ខ្នង ៦បន្ទប់។
១០/ជួយរៀបចំប្រព័ន្ធទឹកស្អាត និងអគ្គិសនី។
១១/ជួយកសាងអណ្ដូងទឹកចំនួន២០៕
