កិច្ចប្រជុំផ្សព្វផ្សាយ ស្តីពីផែនការយុទ្ធនាការប្រយុទ្ធប្រឆាំង គ្រឿងញៀន ខុសច្បាប់លើកទី៤ នៅខេត្តកែប
ខេត្តកែប៖នៅព្រឹកថ្ងៃទី៣១ ខែឧសភា ឆ្នាំ២០១៩នេះ លេខាធិការដ្ឋានគណៈកម្មាធិការត្រួតពិនិត្យគ្រឿងញៀនខេត្តកែប បានរៀបចំកិច្ចប្រជុំផ្សព្វផ្សាយ ស្តីពីផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៤ ក្រោមអធិបតីភាព លោក កែន សត្ថា អភិបាល នៃគណៈអភិបាលខេត្ត និងជាប្រធានគណៈកម្មាធិការត្រួតពិនិត្យគ្រឿងញៀនខេត្តកែប ដែលពិធីនេះក៏មានការចូលរួមពីលោក លោកស្រី ជាអភិបាលរងខេត្ត ប្រធាន អនុប្រធានមន្ទីរអង្គភាពទូទាំងខេត្ត កងកម្លាំងទាំងបី គណៈអភិបាលក្រុង ស្រុក ក្រុមយុវជនកាយរិទ្ធ និងមន្ត្រីចំណុះរដ្ឋបាលខេត្តទាំងមូល។
ក្នុងកិច្ចប្រជុំនេះ លោក កែន សត្ថា ប្រធានគណៈកម្មាធិការត្រួតពិនិត្យគ្រឿងញៀនខេត្តកែប បានគូសបញ្ជាក់ថា យុទ្ធនាការប្រយុទ្ធប្រឆាំងគ្រឿងញៀនខុសច្បាប់ បានដំណើរការយ៉ាងសកម្ម ហើយការអនុវត្តនិងចាត់វិធានការច្បាប់ទទួលបានលទ្ធផលខ្ពស់ ដោយសមត្ថកិច្ចពាក់ព័ន្ធបានបើកប្រតិបតិ្តការយ៉ាងក្តៅគគុក ដូចជាការបង្កា ការបង្ក្រាប លើការប្រើប្រាស់គ្រឿងញៀនបានជាច្រើនករណីផងដែរ។
ចំពោះលទ្ធផលនៃការបង្ក្រាបខាងលើនេះ បានធ្វើឱ្យបទល្មើសឧក្រិដ្ឋមួយចំនួនមានការថយចុះ ដូចជាអំពើឆក់ប្លន់ និងឃាតកម្ម ដែលស្ថានភាពបែបនេះបានជះឥទ្ធិពលជាវិជ្ជមានដល់បរិយាកាសសន្តិសុខ សណ្តាប់ធ្នាប់ទូទៅ ជាពិសេស ការបង្ក្រាបឃាត់ខ្លួនជនសង្ស័យពាក់ព័ន្ធបទល្មើសគ្រឿងញៀន និងការបន្សាបព្យាបាលអ្នកប្រើប្រាស់សារធាតុញៀន ដែលបានកាត់បន្ថយក្តីបារម្ភរបស់ប្រជាពលរដ្ឋអំពីបញ្ហាសន្តិសុខ សណ្តាប់ធ្នាប់នៅក្នុងមូលដ្ឋាន ក៏ដូចជាជួយស្រោចស្រង់អនាគតយុវវ័យ និងបង្កើនភាពកក់ក្តៅដល់អាណាព្យាបាល ឬក្រុមគ្រួសាររបស់ពួកគេផងដែរ។
ជាចុងក្រោយ លោកអភិបាលខេត្តបានជំរុញដល់អាជ្ញាធរនិងសមត្ថកិច្ចពាក់ព័ន្ធត្រូវមានវិធានការផ្សព្វផ្សាយ សហការគ្នា បង្ការ ទប់ស្កាត់ កុំឱ្យកើតមានបទល្មើសគ្រឿងញៀននៅក្នុងមូលដ្ឋាន។លោកថា គ្រឿងញៀនបានធ្វើឱ្យគ្រួសារជួបផលវិបាកគ្រប់ជំពូក និងបានបង្កភាពវឹកវរដល់សង្គមជាតិទាំងមូល៕
