ឯកឧត្តម ឧកញ៉ាបណ្ឌិតជា រតនា និងលោកជំទាវ ប្រគល់រថយន្តសង្គ្រោះ ដែលជាអំណោយរបស់សម្តេចតេជោ ជូនអធិការដ្ឋាននគរបាល ក្រុងប៉ោយប៉ែត
ខេត្តបន្ទាយមានជ័យ៖ដោយមានខ្វះខាតនូវរថយន្តសង្គ្រោះបន្ទាន់នៅក្នុងប៉ោយប៉ែត នាព្រឹកថ្ងៃចន្ទ ៨កើត ខែជេស្ន ឆ្នាំកុរ ឯកស័ក ពុទ្ធសរាជ ២៥៦៣ ត្រូវនឹងថ្ងៃទី១០ ខែមិថុនា ឆ្នាំ២០១៩ ឯកឧត្តម ឧកញ៉ា បណ្ឌិតជា រតនា និងលោកជំទាវលី ហៀក រតនា បាននាំយករថយន្តសង្គ្រោះ ដែលជាអំណោយរបស់ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជូនអធិការដ្ឋាននគរបាល ក្រុងប៉ោយប៉ែត ដើម្បីជាមធ្យោបាយដ៏សំខាន់សម្រាប់ជួយសង្គ្រោះដល់អ្នកជំងឺទាន់ពេលវេលា។
ពិធីផ្តល់រថយន្តសង្គ្រោះបន្ទាន់ជូនអធិការដ្ឋាននគរបាល ក្រុងប៉ោយប៉ែត បានធ្វើឡើងនៅមន្ទីពេទ្យបង្អែកប៉ោយប៉ែត ស្ថិតនៅភូមិប្រជាធម្មកើត សង្កាត់ផ្សាកណ្តាល ក្រុងប៉ោយប៉ែត ខេត្តបន្ទាយមានជ័យ ដោយមានការអញ្ជើញចូលរួមពីឯកឧត្តម លោកជំទាវ លោកឧញ៉ា និងមន្ត្រីរាជការជាច្រើនស្ថាបន័នៅក្នុងប៉ោយប៉ែត លោកគ្រូ អ្នកគ្រូពេទ្យ ព្រមទាំងប្រជាពលរដ្ឋយ៉ាច្រើនកុះករផងដែរ។
ថ្លែងក្នុងឱកាសនោះដែរ ឯកឧត្តម ឧកញ៉ា បណ្ឌិតជា រតនា បានមានប្រសាសន៍ថា ដោយមើលឃើញក្រុងប៉ោយប៉ែតមានការរីកចំរើនលើគ្រប់វិស័យគួរឲ្យកត់សម្គាល់ ទើបឯកឧត្តម ឧកញ៉ា បណ្ឌិត បាននាំយករថយន្តសង្គ្រោះ ដែលជាអំណោយរបស់ដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ជូនអធិការដ្ឋាននគរបាល ក្រុងប៉ោយប៉ែត ដើម្បីងាយស្រួលក្នុងការជួយសង្គ្រោះដល់ប្រជាពលរដ្ឋដែលជួបបញ្ហាឧបទ្ទវហេតុគ្រោះថ្នាក់ចរាចរណ៍ និងដឹកអ្នកជំងឺផ្សេងៗ ទៀតមកកាន់មន្ទីពេទ្យ។
ទទឹមនោះដែរលោកវរសេនីយ៍ឯក ធិន ស៊ិនដេត អធិការនគរបាលក្រុងប៉ោយប៉ែត បានថ្លែង អំណរគុណដល់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា ដែលបានយកចិត្តទុកដាក់ចំពោះពលរដ្ឋខ្មែរ និងបានប្រគល់រថយន្តសង្រ្គោះបន្ទាន់ជូនដល់អធិការដ្ឋាននគរបាល ក្រុងប៉ោយប៉ែត ដើម្បីជួយសង្គ្រោះពលរដ្ឋក្នុងមូលដ្ឋានដែលរងគ្រោះ និងជួបបញ្ហាផ្សេងៗ។
ជាកិច្ចបញ្ចប់ នៃកម្មវិធីឯកឧត្តម ឧកញ៉ា បណ្ឌិតជា រតនា រួមនឹងឯកឧត្តម លោកជំទាវ លោកឧញ៉ា និងមន្ត្រីរាជការ នាំយកនូវអំណោយជាថវិការ គ្រឿងឧបភោគបរិភោគ និងសម្ភារៈមួយចំនួនចែកជូនដល់អ្នកជំងឺ ដែលកំពុងសម្រាកនៅមន្ទីពេទ្យបង្អែក(ដីថ្មី)ចំនួន១០០នាក់៕