ជនជាតិចិន២នាក់បានស្លាប់ ខ្មែរ២នាក់របួសធ្ងន់ ស្រាលម្នាក់ ក្នុងហេតុការគ្រោះថ្នាក់ចរាចរណ៍ បង្កឡើងដោយរថយន្តដឹកភ្ញៀវ ពីសៀមរាបមកប៉ោយប៉ែត
ខេត្តបន្ទាយមានជ័យ៖ករណីគ្រោះថ្នាក់ចរាចរណ៍លើកំណាត់ផ្លូវជាតិលេខ៥ ចំណុចភូមិអូរខៃដន ឃុំកូប ស្រុកអូរជ្រៅ ខេត្តបន្ទាយមានជ័យ រវាងរថយន្តដឹកភ្ញៀវទេសចរណ៍ ពីព្រលានយន្តហោះអន្តរជាតិសៀមរាបឆ្ពោះទៅក្រុងប៉ោយប៉ែត ខេត្តបន្ទាយមានជ័យ បណ្តាលឲ្យស្លាប់ជនជាតិចិន២នាក់ ខ្មែរ២នាក់របួសធ្ងន់ ស្រាលនៅម៉ោងវេលាម៉ោង៥និង១០នាទីល្ងាចថ្ងៃទី២១ ខែឧសភា ឆ្នាំ២០១៩ ។
មន្ត្រីនគរបាលចរាចរណ៍ស្រុកអូរជ្រៅបានប្រាប់អ្នកយកព័ត៌មានឲ្យដឹងថា៖នៅមុនពេលកើតហេតុនោះមានរថយន្តម៉ាកតូយ៉ូតាឡិចស៊ីស៣៣០ ពណ៍ផ្សែងបារីស្លាកលេខ២B ១៤០១ បាត់ដំបង អ្នកបើកមិនស្គាល់អត្តសញ្ញាណបានដឹកភ្ញៀវជនជាតិចិនពីព្រលានយន្តហោះសៀមរាបមកក្រុងប៉ោយប៉ែត បើកបរក្នុងទិសដៅពីកើតកមលិចក្នុងល្បឿនលឿនលុះបើកមកដល់ចំណុចកើតហេតុស្រាប់តែឡើងជែងរថយន្តផ្សេងទៀត រួចជ្រុលទៅបុកពីក្រោយរថយន្តម៉ាក់ហ៊ីយ៉ាន់ថាយពណ៍ខៀវដឹកទូរ អ្នកបើកមិនស្គាល់អត្តសញ្ញាណពេញទំហឹងបណ្តាលឲ្យរថយន្តឡើងរួញហើយក្រឡាប់នៅនឹងកន្លែងកើតហេតុ ក្នុងរថយន្តឡិចសីស គេឃើញមានប្រុសម្នាក់ ស្ត្រីម្នាក់ ជាជនជាតិចិនបានស្លាប់ អ្នកបើករថយន្តរងរបួសធ្ងន់។
ចំណែកផ្នែករថយន្តដឹកទូរវិញ អ្នកបើករងរបួសស្រាល តែស្ត្រីជាប្រពន្ធ ដែលរួមដំណើរលក់ដូរ បានរងរបួសធ្ងន់បាក់ជើងម្ខាងដែរ។
មន្ត្រីនគរបាលបានបន្តទៀតថា៖មកទល់ពេលនេះ សមត្ថកិច្ចបាននឹងកំពុងដឹកជញ្ជូនសពទៅរក្សាទុកនៅវត្តហើយ រីឯអ្នករបួសត្រូវបញ្ជូនទៅមន្ទីរពេទ្យខេត្តមិត្តភាពកម្ពុជា ជប៉ុនមង្គលបូរី។ចំណែករថយន្តត្រូវបាននគរបាលចរាចរណ៍យកទៅរក្សាទុកនៅអធិការដើម្បីដោះស្រាយនៅពេលក្រោយចំណែកនគរបាលកំពុងសំរួលចរាចរណ៍ឲ្យដំណើរការឡើងវិញផងដែរ៕