ឯកឧត្តមអភិបាលខេត្តកំពតចុះត្រួតពិនិត្យការកែលម្អសោភ័ណភាពរង្វង់មូលទុរេននិងក្លោងទ្វារពហុកីឡដ្ឋានខេត្តកំពត
ខេត្តកំពត៖នៅព្រឹកថ្ងៃទី០៨ ខែធ្នូ ឆ្នាំ២០១៩ ឯកឧត្តម ជាវ តាយ អភិបាល នៃគណៈអភិបាលខេត្តកំពត បានអញ្ជើញចុះត្រួតពិនិត្យការរៀបចំកែលម្អសោភ័ណភាពក្លោងទ្វារពហុកីឡដ្ឋានខេត្តកំពត សម្រាប់ត្រៀមរៀបចំប្រារព្ធពិធីបុណ្យសមុទ្រ ដែលនឹងប្រព្រឹត្តទៅនៅថ្ងៃទី២០រហូតដល់ថ្ងៃទី២២ ខែធ្នូ ឆ្នាំ២០១៩ខាងមុខនេះ។
ជាមួយគ្នានេះរង្វង់មូលផ្លែទុរេនក្រុងកំពត បន្ទាប់ពីមានមជ្ឈដ្ឋានរិះគន់ថា បានរៀបចំកែលម្អខុសទ្រង់ទ្រាយដើមនោះ ខណៈនេះរដ្ឋបាលខេត្តកំពតក៏បានជំរុញដល់អាជ្ញាធរពាក់ព័ន្ធធ្វើការកែលម្អ រចនាសារជាថ្មី ឱ្យមានលក្ខណៈល្អប្រសើរឡើងវិញ និងដូចទ្រង់ទ្រាយដើមវិញហើយ។
សូមជម្រាបផងដែរថា៖ ការរៀបចំសោភ័ណភាពតុបតែងគ្រប់ហេដ្ឋារចនាសម្ព័ន្ធនៅក្នុងក្រុងកំពតដើម្បីត្រៀមលក្ខណៈអបអរសាទរពិធីបុណ្យសមុទ្រលើកទី ៨ ជុំទី ២ នៃខេត្តកំពតដែលប្រព្រឹត្តទៅនៅថ្ងៃទី២០-២១-២២ ខែធ្នូ ឆ្នាំ២០១៩ខាងមុខនេះ រាល់ការកែលំអរសោភ័ណភាពរបស់ក្រុងកំពត និងរដ្ឋបាលខេត្តនាពេលកន្លងមកឃើញថា គ្រប់ហេដ្ឋារចនាសម្ព័ន្ធពិតជាមានសោភ័ណភាពគួរឱ្យទាក់ទាញ។ប៉ុន្តែទន្ទឹមនឹងការកែប្រែសោភ័ណភាពយ៉ាងស្រស់បំព្រងបែបនេះ ក៏មានមតិមហាជនបានសំដែងការរិះគន់ ដូចជាកន្លែងខ្លះបន្ទាប់ពីបានកែលម្អ ដោយភ្លើងផ្កាភ្ញីខ្លាំងពេកបណ្ដាលឱ្យបាត់បង់សោភ័ណភាពដើម ពិសេសចំណុចរង្វង់មូលផ្លែទុរេនតែម្តង។
ក្រោយពីមានមតិរិះគន់ពីមជ្ឈដ្ឋានមួយចំនួនរួចមករដ្ឋបាលខេត្តកំពត ក៏បានកែតម្រូវឡើងវិញដែលបានធ្វើឱ្យសោភ័ណភាពដើមរបស់ទុរេនមើលទៅសក្តិសមជាផ្លែទុរេនគ្រប់រដូវកាល បើទោះបីមើលពេលយប់ឬពេលថ្ងៃក៏រូបផ្លែទុរេនក្នុងក្រុងកំពត នៅតែរំលេចសោភ័ណភាពយ៉ាងស្រស់ត្រកាលដូចមុនដដែល៕