សាខាកាកបាទក្រហមខេត្តកំពង់ចាម ប្រារព្ធទិវាអន្តរជាតិ នៃអ្នកស្ម័គ្រចិត្ត ៥ ធ្នូ ២០១៩ ក្រោមប្រធានបទ «ស្ម័គ្រចិត្ត ដើម្បី អនាគតប្រកបដោយបរិយាប័ន្ន»
ខេត្តកំពង់ចាម៖នៅព្រឹកថ្ងៃទី០៩ ខែធ្នូ ឆ្នាំ២០១៩ ឯកឧត្ដម អ៊ុន ចាន់ដា អភិបាលខេត្ត និងជាប្រធានគណៈកម្មាធិការ សាខាកាបាទក្រហមកម្ពុជា ខេត្តកំពង់ចាម បានអញ្ជើញជា អធិបតីភាក្នុងទិវាអន្តរជាតិ នៃអ្នកស្ម័គ្រចិត្ត ៥ ធ្នូ ២០១៩ ក្រោមប្រធានបទ «ស្ម័គ្រចិត្ត ដើម្បី អនាគតប្រកបដោយបរិយាប័ន្ន»។
ក្នុងឱកាសនោះដែរក៏មានការអញ្ជើញចូលរួម ពីលោកជំទាវអភិបាលរងខេត្ត លោក លោកស្រី ជាសមាជិក សមាជិក គណៈកម្មាធិការសាខា អ្នកស្ម័គ្រចិត្ត និងយុវជនជនកាកបាទក្រហម ជាច្រើននាក់ ផងដែរ។
ថ្លែងក្នុងឱកាសនោះដែរឯកឧត្ដម អ៊ុន ចាន់ដា ប្រធានគណៈកម្មាធិការ សាខាកាបាទក្រហមកម្ពុជា ខេត្តកំពង់ចាម បានចាត់ទុកថា ៖ «សមិទ្ធិផល និងសកម្មភាព ដ៏រស់រវើក របស់អ្នកស្ម័គ្រចិត្ត ដែលសម្រេចបានកន្លងមក គឺពោរពេញទៅដោយការស្ម័គ្រចិត្ត និងឧត្ដមគតិ មនុស្សធម៌ ក្រោមការដឹកនាំផ្ទាល់ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ពិតប្រាកដ» ។
ឯកឧត្ដម អ៊ុន ចាន់ដា បញ្ជាក់ថា រយៈពេល១ឆ្នាំ កន្លងមកនេះ គណៈកម្មាធិការសាខាកាបាទក្រហមកម្ពុជា ខេត្តកំពង់ចាម បានខិតខំយកចិត្តទុកដាក់ អនុវត្តលើវិស័យស្នូលទាំង៤ របស់កាកបាទក្រហមកម្ពុជា រួមទាំង ការត្រៀមបង្ការ និងការឆ្លើយតបគ្រោះមហន្តរាយ ដែលបង្កឡើងដោយការប្រែប្រួលអាកាសធាតុ ធ្វើឲ្យខូចខាតយ៉ាងធ្ងន់ធ្ងរមកលើលំនៅដ្ឋាន និងប៉ះពាល់ដលជីវភាពរស់នៅរបស់ប្រជាពលរដ្ឋ តាមបណ្ដាស្រុកមួយចំនួន។ប៉ុន្តែ ដោយការរួមគ្នា យើងប្រមូលបានកម្លាំងមនុស្សធម៌ជួយប្រជាពលរដ្ឋរងគ្រោះ បានទាន់ពេលវេលា និងមានប្រសិទ្ធភាព។
ជាក់ស្ដែង ខេត្តបានរៀបចំស្បៀងសង្គ្រោះបន្ទាន់ ដល់គ្រួសាររងគ្រោះដោយអគ្គីភ័យ ខ្យល់កន្ត្រាក់ បាក់ច្រាំង គ្រួសារចាស់ជរា ជនពិការជួបការលំបាក ស្ត្រីមេម៉ាយកូនច្រើន គ្រួសារជនពិការ អ្នកជម្ងឺអេដស៍ គ្រួសារកងទ័ព គ្រួសារជនពលី ចូលបុណ្យសព និងគ្រួសារមានជម្ងឺធ្ងន់ជាដើម ...។ល។
ឆ្លៀតក្នុងឱកាសនោះដែរ ឯកឧត្ដម អ៊ុន ចាន់ដា ក៏បានសម្ដែងនូវអំណរគុណ យ៉ាងជ្រាលជ្រៅ ចំពោះ សម្ដេចកិត្តិព្រឹទ្ធបណ្ឌិតប្រធាន ដែលបានដឹកនាំកាកបាទក្រហមកម្ពុជា ប្រកបដោយកិត្តិបណ្ឌិត ដើម្បី ជីវភាពរស់នៅ សុខុមាលភាព និងជួយកាត់បន្ថយភាពក្រីក្រ របស់ប្រជាពលរដ្ឋ តាមរយៈ តម្លៃមនុស្សធម៌ បានកាន់តែប្រសើរឡើង ពីមួយថ្ងៃ ទៅមួយថ្ងៃ។ទន្ទឹមជាមួយនោះ ឯកឧត្ដមប្រធានគណៈកម្មធិការសាខា ក៏សូមថ្លែងអំណរគុណ ចំពោះ អនុសាខាក្រុង ស្រុក ក៏ដូចជាអ្នកស្ម័គ្រចិត្តទាំងអស់ ដែលបានចូលរួមចំណែកយ៉ាងសំខាន់ ជាមួយសាខាខេត្ត ក្នុងការបំពេញបេសកកម្មមនុស្សធម៌ របស់ខ្លួន ក្នុងការផ្ដល់សេវា និងការសម្របសម្រួលកាងារ ដើម្បី ឆ្លើយតបទៅនឹងជនរងគ្រោះ និងជនងាយរងគ្រោះបំផុត ដើម្បី លើកកម្ពស់តម្លៃមនុស្សធម៌ ជូនប្រជាពលរដ្ឋ ទូទាំងខេត្តកំពង់ចាម ផងដែរ៕