ប៉ាណូខ្លោងទ្វារចូលផ្សារកំពង់ត្រាច ផ្នែកខាងលិច ដាច់ធ្លាក់ចុះក្រោម បណ្តាលឱ្យស្ត្រីម្នាក់រងរបួសធ្ងន់
ខេត្តកំពត៖ស្ត្រីម្នាក់បានរងរបួសយ៉ាងដំណំ ខណៈផ្លាកប៉ាណូមួយផ្ទាំង ស្ថិតចំណុចក្លោងទ្វារចូលផ្សារកំពង់ត្រាចផ្នែកខាងលិច បានដាក់ធ្លាក់មកក្រោមសង្កត់ពីលើនៅវេលាម៉ោង១០និង១០នាទីព្រឹក ថ្ងៃទី០៧ ខែធ្នូ ឆ្នាំ២០១៩។
តាមប្រភពព័ត៌មាននៅកន្លែងកើតហេតុបាននិយាយថា ប៉ាណូដែលធ្លាក់បង្កហានិភ័យដល់មនុស្សនេះ ជារបស់ក្រុមហ៊ុនសាប៊ូវីសូ(Viso)ហើយផ្លាកប៉ាណូនេះ ត្រូវបានដាក់តាំងបញ្ឈរនៅមុខខ្លោងទ្វារផ្សារស្រុកកំពង់ត្រាច ខេត្តកំពត ជាច្រើនឆ្នាំមកហើយ ប៉ុន្តែគេមិនដែលឃើញផ្នែកពាក់ព័ន្ធណាមួយមកត្រួតពិនិត្យឡើយ ដោយការដាច់ធ្លាក់យ៉ាងផុយស្រួយបែបនេះ សង្ស័យច្រេះស៊ីដែកផ្តាច់មុខតំណរ ឬផ្សារមិនជាប់និយាយឱ្យស្រួលស្តាប់ គឺការតម្លើងផ្លាកយីហោមានការធ្វេសប្រហែសនិងគ្មានគុណភាព ទើបប៉ាណូនេះងាយដាច់ធ្លាក់បង្កឱ្យមនុស្សរងគ្រោះបែបនេះ។
ប្រភពដដែលបានបន្តថា នេះចាត់ទុកជាសំណាងល្អហើយ ព្រោះអំឡុងពេលប៉ាណូបាក់ធ្លាក់នោះ ស្របពេលដែលពុំសូវមានមនុស្សចេញចូលច្រើនដូចពេលព្រឹក តែបើប៉ាណូនេះធ្លាក់នៅពេលព្រឹកព្រលឹមវិញមិនដឹងមានមនុស្សប៉ុន្មាននាក់ទេដែលត្រូវរងគ្រោះថ្នាក់ដោយសារប៉ាណូសង្កត់នោះ។
គេបានបញ្ជាក់ផងដែរថា ស្ត្រីដែលរងរបួសដោយសារប៉ាណូសង្កត់មានឈ្មោះ ជិន ខ្លឹង ភេទស្រី អាយុ៣៧ឆ្នាំ មុខរបរកសិករ រងរបួសធ្ងន់(បាក់ខ្ទង់ច្រមុះ) រស់នៅភូមិកោះផ្តៅ ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។
បច្ចុប្បន្នស្ត្រីរងគ្រោះ ដោយសារមានស្ថានភាពរបួសធ្ងន់ធ្ងរ ត្រូវបានក្រុមគ្រួសារដឹកបញ្ជូនទៅសង្គ្រោះព្យាបាលនៅឯមន្ទីរពេទ្យប្រទេសវៀតណាម៕
