រដ្ឋបាលស្រុកដំណាក់ចង្អើរ ប្រារព្ធខួបអនុស្សាវរីយ៍លើកទី៤១ នៃទិវាកំណើតរណសិរ្សសាមគ្គីអភិវឌ្ឍន៍ មាតុភូមិកម្ពុជា
ខេត្តកែប៖កាលពីព្រឹកថ្ងៃទី០៦ ខែធ្នូ ឆ្នាំ២០១៩ នៅសាលប្រជុំសាលាស្រុកដំណាក់ចង្អើរ មានរៀបចំពិធីរំលឹកខួបអនុស្សាវរីយ៍លើកទី៤១នៃទិវាកំណើតរណសិរ្សសាមគ្គី អភិវឌ្ឍន៍មាតុភូមិកម្ពុជា(២ធ្នូ១៩៧៨-២ធ្នូ២០១៩)។
ពិធីនេះស្ថិតក្រោមអធិបតីភាព លោកស្រី គឹម ចន្នីអភិបាល នៃគណៈអភិបាលស្រុកដំណាក់ចង្អើរ និងជាប្រធានគណៈកម្មាធិការគណបក្សប្រជាជនកម្ពុជាស្រុក និងលោកប្រធានស្តីទីក្រុមប្រឹក្សាស្រុក ព្រមទាំងមានការអញ្ជើញចូលរួមពី លោក លោកស្រី សមាជិកក្រុមប្រឹក្សាស្រុក លោកអភិបាលរងស្រុក កងកម្លាំងប្រដាប់អាវុធ មន្ត្រីក្រោមឱវាទ ក្រុមយុវជនទាំងបីប្រភេទ និងសិស្សានុសិស្សយ៉ាងច្រើនកុះករ។
ថ្លែងក្នុងពិធីនេះ លោកស្រី គឹម ចន្នី អភិបាលស្រុកដំណាក់ចង្អើរ បានមានប្រសាសន៍ថា ក្នុងរយៈពេល៣ឆ្នាំ ៨ខែ និង២០ថ្ងៃ ក្រោមការត្រួតត្រារបស់ ប៉ុល ពតបានបង្កវិនាសសកម្មលើគ្រប់វិស័យ ដោយបំផ្លាញអស់នូវរាល់រចនាសម្ព័ន្ធសង្គមជាតិ និងកាប់សម្លាប់ប្រជាជនឯងយ៉ាងរង្គាលបំផុត។ ប្រជាជនកម្ពុជាជាង៣លាន៣សែននាក់បានបាត់បង់ជីវិតយ៉ាងអយុត្តិធម៌បំផុត។
លោកស្រីអភិបាលស្រុក បានបញ្ជាក់ទៀតថា ព្រោះតែមើលឃើញនូវអំពើដ៏សាហាវយង់ឃ្នងនោះ ទើបកើតមានចលនាបះបោរក្រោកឈរឡើងតស៊ូរបស់ប្រជាជនគ្រប់ទិសទីដោយបង្កើតជារណសិរ្សសាមគ្គីសង្រ្គោះជាតិកម្ពុជានាថ្ងៃទី២ ខែធ្នូ ឆ្នាំ១៩៧៨ ដែលបច្ចុប្បន្នមានឈ្មោះថារណសិរ្សសាមគ្គីអភិវឌ្ឍន៍មាតុភូមិកម្ពុជា ហើយកម្លាំងបដិវត្តន៍នៃរណសិរ្យសាមគ្គីសង្រ្គោះជាតិកម្ពុជា ដោយមានការគាំទ្រពីប្រជាជនគ្រប់ទិសទីក៏បានវាយសម្រុកផ្តាច់ព្រ័តរហូតទទួលបានជ័យជម្នះជាប្រវត្តិសាស្រ្តលើរបបកម្ពុជាប្រជាធិបតេយ្យនៅថ្ងៃទី៧ ខែមករា ឆ្នាំ១៩៧៩។
លោកស្រីអភិបាលស្រុក បានក្រើនរំលឹកផងដែរថា ដូច្នេះសូមបងប្អូន ពិសេសយុវជន យុវនារីទាំងអស់ចងចាំថាមានរណសិរ្យ២ធ្នូឆ្នាំ១៩៧៨ ទើបមាន ថ្ងៃទី៧ ខែមករា ឆ្នាំ១៩៧៩ ដែលធ្វើឱ្យប្រជាជនកម្ពុជារួចផុតពីរណ្តៅមរណៈ។ បន្ថែមពីនេះទៅទៀត គឺមានថ្ងៃទី៧ ខែមករា ឆ្នាំ១៩៧៩ នេះហើយ ទើបយើងមានអ្វីៗគ្រប់យ៉ាងដូចសព្វថ្ងៃនេះ៕
