ឆេះបន្ទប់ជួលស្នាក់នៅ ក្នុងក្រុងព្រះសីហនុ សំណាងល្អមិនបណ្ដាលឲ្យគ្រោះថ្នាក់ដល់មនុស្ស
ខេត្តព្រះសីហនុ៖ករណីអគ្គីភ័យឆាបឆេះបន្ទប់ជួលក្នុងក្រុងព្រះសីហនុកាលពីវេលាម៉ោង០៤និង៣០នាទីព្រឹក ថ្ងៃទី០៦ ខែធ្នូ ឆ្នាំ២០១៩ ស្ថិតក្នុងក្រុមទី១៤ ភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ មិនដឹងពីមូលហេតុ។
បន្ទប់ជួល ដែលរងការឆាប់ឆេះពីអគ្គីភ័យនោះ បណ្តាលឲ្យខូចខាត ឆេះបន្ទប់ជួលស្នាក់នៅ ទំហំ៣ម៉ែត្រគុណ៤ម៉ែត្រ ធ្វើពីឈើប្រក់ស័ង្កសី ចំនួន០៦បន្ទប់ តែមិនមានមនុស្សរងរបួស ឬគ្រោះថ្នាក់ដល់អាយុជីវិតមនុស្សឡើយ រីឯមូលហេតុឆេះនៅមិនទាន់ដឹងនៅឡើយ។
បើតាមសមត្ថកិច្ចបានឲ្យដឹងថា បន្ទាប់ពីទទួលបានព័ត៌មានថា មានករណីអគ្គីភ័យឆាបឆេះបន្ទប់ជួលស្នាក់នៅនោះ លោកឧត្តមសេនីយ៍ត្រី ហេង ប៊ុនទី មេបញ្ជាការ កងរាជអាវុធហត្ថខេត្តព្រះសីហនុ បានដឹកនាំកម្លាំងការិយាល័យជំនួយមនុស្សធម៌ និងសង្រ្គោះគ្រោះមហន្តរាយ កម្លាំងកងរាជអាវុធហត្ថក្រុងព្រះសីហនុ ប្រើប្រាស់កម្លាំងសរុបចំនួន២០នាក់ សហការជាមួយកម្លាំងស្នងការនគរបាលខេត្ត ចេញអន្តរាគមន៍ និងជួយសង្រ្គោះបាញ់ទឹកពន្លត់អគ្គីភ័យ បានរលត់ទាំងស្រុងនៅវេលាម៉ោង០៥:២០នាទី ថ្ងៃខែឆ្នាំដដែល មិនបង្ករឱ្យរាលដាលប៉ះពាល់ដល់លំនៅប្រជាពលរដ្ឋរស់នៅក្បែរទីនោះឡើយ។
សមត្ថកិច្ចបញ្ជាក់ថា ក្នុងប្រតិបត្តិការជួយសង្រ្គោះ កម្លាំងមានសមត្ថកិច្ចបានប្រើប្រាស់រថយន្តពន្លត់អគ្គីភ័យ សរុបចំនួន០៣គ្រឿង អស់ទឹក០៥ឡាន រថយន្តពន្លត់អគ្គីភ័យ បញ្ជាការដ្ឋានកងរាជអាវុធហត្ថខេត្ត០១គ្រឿង អស់ទឹក០១ឡាន និងរថយន្តពន្លត់អគ្គីភ័យ ស្នងការនគរបាលខេត្ត០២គ្រឿង អស់ទឹក០៤ឡាន ទើបរលត់ជាស្ថាពរ៕
