ចាប់ឃាត់ខ្លួន ចោរលួចកាចកម៉ូតូម្នាក់ នៅស្ទឹងមានជ័យទី៣
រាជធានីភ្នំពេញ៖កាលពីវេលាម៉ោង២ និង២៥នាទីរសៀល ថ្ងៃទី០៦ ខែធ្នូ ឆ្នាំ២០១៩ កម្លាំងនគរបាលប៉ុស្ដិ៍ស្ទឹងមានជ័យទី៣ ចានចាប់ឃាត់ខ្លួនជនសង្ស័យម្នាក់ បន្ទាប់ពីធ្វើសកម្មភាពលួចកាចកម៉ូតមិនបានសម្រេច នៅចំណុចផ្លូវវេងស្រេង ភូមិដំណាក់ធំ៥ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។
លោក ឯម ភារី នាយប៉ុស្ដិ៍នគរបាលស្ទឹងមានជ័យទី៣ បានឲ្យដឹងថា ជនសង្ស័យមានឈ្មោះ យ៉ុង បញ្ញា ភេទប្រុសអាយុ២៩ ឆ្នាំមុខរបរ មិនពិតប្រាកដ ស្នាក់នៅក្នុងបុរីឡាយគង់ ភូមិម័ល សង្កាត់ដង្កោ ខណ្ឌដង្កោ ។ចំណែកជនរងគ្រោះមានឈ្មោះ ប៉ែន សុក្រនីនាថ ភេទស្រី អាយុ២០ឆ្នាំ មុខរបរបុគ្គលិកក្រុមហ៊ុន ស្នាក់នៅភូមិដំណាក់ធំ សង្កាត់ស្ទឹងមានជ័យ២ ខណ្ឌមានជ័យ។
លោកនាយប៉ុស្ដិ៍បានបន្ដទៀតថា មុនពេលកើតហេតុជនរងគ្រោះជិះម៉ូតូមួយគ្រឿងម៉ាកនិច ពណ៌ខ្មៅលាយក្រហម ពាក់ស្លាកលេខភ្នំពេញ1BW - 6596 ជិះពីផ្ទះទៅក្រុមហ៊ុនចំណុចក្នុងបុរីប៉េងហួត រួចទុកម៉ូតូនៅមុខកន្លែងធ្វើការ ស្រាប់តែមួយស្ទុះក្រោយមកក៏មានជនសង្ស័យម្នាក់ដើរទៅវិញទៅមក ហើយក៏បានដើរមកក្បែរម៉ូតូលួចកាចក ពេលនោះសន្ដិសុខយាមក្នុងបុរីបានស្រែកធ្វើឲ្យជនសង្ស័រត់គេចខ្លួន ក៏ត្រូវសមត្ថកិច្ចប៉ុស្ដិ៍ស្ទឹងមានជ័យ៣ ឃាត់ខ្លួនយកមកធ្វើការសាកសួតែម្ដង។
នៅចំពោះមុខសមត្ថកិច្ចជនសង្ស័យបានឆ្លើយសារភាពថា ខ្លួនពិតជាបានមកធ្វើសកម្មភាពលួចកាច់កម៉ូតូពិតប្រាកដមែន។
ក្រោយពេលកើតហេតុកម្លាំងសមត្ថកិច្ចនគរបាលប៉ុស្តិ៍ស្ទឹងមានជ័យទី៣ បានកសាងសំណុំរឿងបញ្ជូនជនសង្ស័យ ទៅកាន់អធិការដ្ឋាននគរបាលខណ្ឌមានជ័យ ដើម្បីចាត់ការបន្តទៅតាមនីតិវិធី៕
