ស្ទាវឡើងក បម្រុងចាប់រំលោភកុមារីអាយុ៦ឆ្នាំម្នាក់ សំណាងល្អពលរដ្ឋជួយទាន់
ខេត្តកណ្ដាល៖ក្មេងស្ទាវអាយុ១៧ឆ្នាំម្នាក់ ត្រូវបានកម្លាំនគរបាលស្រុកខ្សាច់កណ្ដាល ចាប់វាយខ្នោះបន្ទាប់ពីប៉ន់ប៉ងចាប់រំលោភកុមារីអាយុ៦ឆ្នាំម្នាក់ ខណ:ដែលកំពុងជិះកង់ទៅទិញសម្លរ។
ករណីនេះបានកើតឡើងកាលពីវេលាម៉ោង៩ និង៣០នាទីព្រឹកថ្ងៃទី៥ ខែធ្នូ ឆ្នាំ២០១៩ ស្ថិតក្នុងភូមិព្រៃចាស់ ឃុំវិហារសួគ៌ ស្រុកខ្សាច់កណ្តាល។
បើតាមសមត្ថកិច្ចស្រុកខ្សាច់កណ្ដាល បានឲ្យដឹងថា ជនសង្ស័យមានឈ្មោះ ចត ចន្ថា ភេទប្រុស អាយុ១៧ឆ្នាំ ជនជាតិខ្មែរ មុខរបរកម្មករសំណង់។ចំណែកកុមារីរងគ្រោះ មានអាយុ៦ឆ្នាំ ជនជាតិខ្មែរ មុខរបរសិស្ស។ជនសង្ស័យ និងកុមារីរងគ្រោះមានទីលំនៅភូមិមួយគ្នា។
ប្រភពដដែលបន្តថា មុនពេលកើតហេតុ ស្ត្រីឈ្មោះ គ្រី សារ៉ន ជាម្តាយ បានប្រើកុមារីរងគ្រោះឲ្យទៅទិញសម្លរនៅផ្ទះឈ្មោះ អ៊ំ ភេទស្រី ដើម្បីយកមកហូបបាយ ហើយកុមារីរងគ្រោះបានជិះកង់តែម្នាក់ឯងទិញសម្លរ លុះត្រឡប់មកវិញ ដល់កន្លែងស្ងាត់ ស្រាប់តែជនសង្ស័យជិះម៉ូតូកាត់តាមនោះឃើញ ក៏ឈប់ទុកម៉ូតូគៀនផ្លូវ ហើយចាប់កុមារីរងគ្រោះអៀវលើខ្នងដើរកាត់ព្រៃសំដៅទៅអាងហែលទឹក បម្រុងចូលក្នុងបន្ទប់ទឹក ដើម្បីធ្វើសកម្មភាពរំលោភ តែជនរងគ្រោះស្រែកយំខ្លាំងពេក ឮដល់អ្នកមើលថែអាងហែលទឹក ក៏បានទៅជួយកុមារីរងគ្រោះទាន់ពេល រួចចាប់ជនសង្ស័យប្រគល់ឲ្យនគរបាលប៉ុស្តិ៍រដ្ឋបាលវិហារសួគ៌ ដើម្បីចាត់ការតាមច្បាប់តែម្ដង។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាចាប់ក្មេងស្រីរងគ្រោះបំណងយកទៅរំលោភក្នុងបន្ទប់ទឹកប្រាកដមែន។
បច្ចុប្បន្នជនសង្ស័យ ត្រូវបានសមត្ថកិច្ចកំពុងកសាងសំណុំរឿង ដើម្បីចាត់ការតាមនីតិវិធី៕