បញ្ជូនខ្លួន នគរបាលប៉ុស្តិ៍បឹងសាឡាងម្នាក់ ទៅតុលាការ បន្ទាប់បាញ់ត្រូវអ្នកជិតខាង បណ្តាលឲ្យរងរបួស
រាជធានីភ្នំពេញ៖នគរបាលប៉ុស្តិ៍បឹងសាឡាងម្នាក់ ដែលបាញ់អ្នកជិតខាង បណ្តាលឲ្យរងរបួស ព្រោះតែសត្វឆ្កែមួយក្បាល ត្រូវបាននគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ បញ្ជូនខ្លួនទៅអយ្យការអមសាលាដំបូងរាជធានីភ្នំពេញ កាលពីថ្ងៃទី៥ ខែធ្នូ ឆ្នាំ២០១៩ ដើម្បីចាត់ការតាមច្បាប់ ពីបទប៉ុនប៉ងឃាតកម្ម និងប្រើប្រាស់អាវុធដោយគ្មានការអនុញ្ញាត។
បើតាមសមត្ថកិច្ចបានឲ្យដឹងថា៖ជនសង្ស័យមានឈ្មោះ សុង វិសិដ្ឋ បានទាញកាំភ្លើង AK47 បាញ់ចំនួន៤គ្រាប់ផ្ទួនៗ ដោយ៣គ្រាប់បាញ់ឡើងលើ និង១គ្រាប់ទៀត បាញ់ត្រូវចំខ្នងរបស់ជនរងគ្រោះបណ្ដាលឲ្យរងរបួស ទើបមានការភ្ញាក់ផ្អើល កាលពីវេលាម៉ោងប្រមាណ១០ព្រឹក ថ្ងៃទី២ ខែធ្នូ ឆ្នាំ២០១៩ ស្ថិតក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។
សមត្ថកិច្ចបញ្ជាក់ថា មូលហេតុនៃការបាញ់នេះ គឺផ្ដើមចេញពីសត្វឆ្កែចិញ្ចឹមរបស់ជនរងគ្រោះ ធ្លាប់ខាំមន្ដ្រីនគរបាលរូបនេះ ហើយក៏ធ្លាប់ទាស់ពាក្យសម្ដីគ្នាកាលពីពេលកន្លងទៅផងដែរ៕
