ឆ្លងចរន្តអគ្គីសនី ឆេះផ្ទះពលរដ្ឋមួយកន្លែង សំណាងល្អមិនរាលដាលដល់ផ្ទះអ្នកជិតខាង
រាជធានីភ្នំពេញ៖ឆេះផ្ទះពលរដ្ឋមួយកន្លែង ស្ថិតនៅចំណុចផ្ទះលេខ១០CE ជាន់ទី១ ផ្លូវ៣១៦ ក្រុម៣២ ក្នុងសង្កាត់ផ្សារដើមគរ ខណ្ឌទួលគោក រាជធានីភ្នំពេញ កាលពីវេលាម៉ោង១ និង៤០នាទីរសៀល ថ្ងៃទី៥ ខែធ្នូ ឆ្នាំ២០១៩ បង្កការភ្ញាក់ផ្អើលដល់បងប្អូនប្រជាពលរដ្ឋ រួមទាំងសមត្ថកិច្ចមូលដ្ឋានចេញជួយអន្តរាគមន៍ពន្លត់ ខណៈម្ចាស់ផ្ទះមិននៅចាក់សោរពីខាងក្រៅ។
ពាក់ពន្ឋ័ករណីខាងលើនេះបើតាមប្រភពព័ត៌មានពីសមត្ថកិច្ច និងប្រជាពលរដ្ឋនៅកន្លែងកើតហេតុបានឲ្យដឹងថា មុនពេលកើតហេតុម្ចាស់ផ្ទះខាងលើមិននៅផ្ទះ ហើយបានចាក់សោរពីខាងក្រៅ ស្រាប់តែនៅវេលាម៉ោងកើតហេតុ ក៏មានផ្សែងហុយខ្លាំងឡើងៗ និងអណ្តាតភ្លើងចេញពីក្នុងផ្ទះជាន់ទី១ ពេលនោះបងប្អូនប្រជាពលរដ្ឋដែលរស់នៅក្បែរខាងបានរាយការណ៍ទៅសមត្ថកិច្ចមូលដ្ឋានអោយចុះត្រួតពិនិត្យ និងសហការជួយអន្តរាគមន៍ ដោយយកបំពុងពន្លត់អគ្គីភ័យជាច្រើនបំពុង រួមទាំងទុយោទឹកមកបាញ់ជាបន្តបន្ទាប់ ដើម្បីកុំអោយរាលដាលទៅផ្ទះអ្នកជិតខាងបន្តទៀត ហើយសមត្ថកិច្ចក៏បានទាក់ទងហៅរថយន្តពន្លត់អគ្គីភ័យចេញមកជួយអន្តរាគមន៍ ដោយប្រើប្រាស់រថយន្តពន្លត់អគ្គីភ័យអស់មួយគ្រឿងទើបរលត់ទៅវិញជាស្ថាពរ។
សំរាប់ករណីអគ្គីភ័យខាងលើនេះសមត្ថកិច្ចមូលដ្ឋានបានបញ្ចាក់ថា មូលហេតុគឺបណ្តាលមកពីឆ្លងចរន្តអគ្គិសនី ចេញពីបន្ទប់អសណៈ បណ្តាលអោយឆេះរាលដាលខូចខាតសំភារៈក្នុងបន្ទប់មួយចំនួនផងដែរ៕