សាខាកាកបាទក្រហមខេត្តកំពត ប្រារព្ធទិវាពិភពលោក ប្រយុទ្ធប្រឆាំងជំងឺអេដស៍
ខេត្តកំពត៖នារសៀលថ្ងៃពុធ ៨កើត ខែមិគសិរ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៤ ខែធ្នូ ឆ្នាំ២០១៩ សាខាកាកបាទក្រហមកម្ពុជាខេត្តកំពត បានប្រារព្ធទិវាពិភពលោកប្រយុទ្ធប្រឆាំងជំងឺអេដស៍ ១ធ្នូ ឆ្នាំ២០១៩ នៅសាលសន្និសីទខេត្តកំពត ក្រោមអធិបតីភាព ឯកឧត្តម ជាវ តាយ អភិបាល នៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកំពត និងឯកឧត្តម សុឹម គឹមសែន អនុប្រធានអាជ្ញាធរជាតិប្រយុទ្ធជំងឺអេដស៍ ព្រមទាំងថ្នាក់ដឹកនាំមន្ទីរអង្គភាព យុវជនស្ម័គ្រចិត្តកាកបាទក្រហម គ្រួសាររងគ្រោះដោយជំងឺអេដស៍ និងអ្នកផ្ទុកមេរោគអេដស៍ប្រមាណ១០០០នាក់។
ក្នុងពិធីនោះ ឯកឧត្តម ជាវ តាយ បានអានទាំងស្រុងនូវសារលិខិតរបស់សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជាក្នុងឱកាសទិវាពិភពលោកប្រយុទ្ធប្រឆាំងជំងឺអេដស៍ ១ធ្នូ ឆ្នាំ២០១៩។
ជាមួយគ្នានោះដែរឯកឧត្តមប្រធានគណៈកម្មាធិការសាខាកាកបាទក្រហមកម្ពុជាខេត្តកំពត បានផ្តល់អំណោយជូនអ្នកផ្ទុកមេរោគចំនួន៥៥៤នាក់ ដោយម្នាក់ៗទទួលបាន អង្ករ ២៥គីឡូក្រាម ទឹកត្រីមួយយួរ ទឹកដោះគោខាប់ពីរកំប៉ុង ស្ករសមួយគីឡូក្រាម ថវិកាពីរម៉ឺនរៀល និងអាវយឺតមួយកញ្ចប់។ដោយឡែកយុវជនកាកបាទក្រហម១០០នាក់ និងអ្នកស្ម័គ្រចិត្តកាកបាទក្រហម៥០នាក់ ក្នុងម្នាក់ៗទទួលបានមួយម៉ឺនរៀលផងដែរ៕