ACU ឃាត់ខ្លួន អគ្គកុងស៊ុលកម្ពុជា ប្រចាំប្រទេសចិន បញ្ជូនទៅតុលាការរាជធានីភ្នំពេញ ដើម្បីសាកសួរករណីប្រព្រឹត្តអំពើពុករលួយ
រាជធានីភ្នំពេញ៖សមត្ថកិច្ចអង្គភាពប្រឆាំងអំពើពុករលួយ ហៅកាត់ថា ACU បានឃាត់ខ្លួនលោក គ្រុយ លឹមហេង អតីតអគ្គកុងស៊ុល នៃស្ថានអគ្គកុងស៊ុលព្រះរាជាណាចក្រកម្ពុជាប្រចាំទីក្រុងគុនមិញ ខេត្តយូណាន សាធារណរដ្ឋប្រជាមានិតចិន បញ្ជូនមកអយ្យការអមសាលាដំបូងរាជធានីភ្នំពេញ កាលពីថ្ងៃទី២៩ ខែធ្នូ ឆ្នាំ២០១៩ ដើម្បីសាកសួរករណីប្រព្រឹត្តអំពើពុករលួយ។
លោក គុជ គឹមឡុង អ្នកនាំពាក្យអយ្យការអមសាលាដំបូងរាជធានីភ្នំពេញ បានថ្លែងថា ពេលនេះ ខាងអយ្យការកំពុងសាកសួរតាមនីតិវិធីហើយ ពាក់ព័ន្ធករណីអ្វីពិតប្រាកដនោះ លោក គុជ គឹមឡុង បដិសេធមិនធ្វើអត្ថាធិប្បាយទេ ដោយរង់ចាំបញ្ចប់នីតិវិធីនៃការសាកសួរសិន ទើបជម្រាបជូនលទ្ធផល នាពេលក្រោយ។
ពាក់ពន្ឋ័ករណីខាងលើនេះដែរ អ្នកសារព័ត៌មានយើងពុំទាន់អាចទំនាក់ទំនងសុំការបញ្ជាក់ពីលោក កុយ កួង អ្នកនាំពាក្យក្រសួងការបរទេស បាននៅឡើយទេ ដោយសារទូរស័ព្ទចូលគ្មានអ្នកទទួល។
ប្រភពព័ត៌មានក្រៅផ្លូវការមួយ បង្ហើបប្រាប់ថា លោក គ្រុយ លឹមហេង អាយុ៤៥ឆ្នាំ ជាប់សង្ស័យពីបទ បំផ្លាញដោយចេតនា និងគៃបំបាត់ដោយទុច្ចរិត រំលោភអំណាច និងវិតិក្រម ប្រព្រឹត្តកាលពីអំឡុងឆ្នាំ២០១៦ ដល់ខែមិថុនា ឆ្នាំ២០១៨ និងករណីមិនប្រកាសទ្រព្យសម្បត្តិនិងបំណុល ប្រព្រឹត្តនៅព្រះរាជាណាចក្រកម្ពុជា ចាប់ពីឆ្នាំ២០១៥ដល់ឆ្នាំ២០១៩៕