ឯកឧត្តម ជាវ តាយ អញ្ជើញជាអធិបតី ក្នុងពិធីប្រគល់Tablets ជូនរដ្ឋបាលឃុំ សង្កាត់ទូទាំងខេត្តកំពត
ខេត្តកំពត៖ព្រឹកថ្ងៃចន្ទ ៥កើត ខែបុស្ស ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៣០ ខែធ្នូ ឆ្នាំ២០១៩ ឯកឧត្តម ជាវ តាយ អភិបាល នៃគណៈអភិបាលខេត្តកំពតបានអញ្ជើញជាអធិបតីភាព ក្នុងពិធីប្រគល់Tablets ដល់រដ្ឋបាលឃុំសង្កាត់ទូទាំងខេត្តសម្រាប់អនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ ព្រមទាំងកុមារអាយុក្រោម២ឆ្នាំ និងការកំណត់អត្តសញ្ញាណកម្មគ្រួសារក្រីក្រតាមការស្នើសុំ។
ពិធីនេះប្រព្រឹត្តទៅនៅសាលប្រជុំសាលាខេត្ត ដោយមានការអញ្ជើញចូលរួមពីសំណាក់ឯកឧត្តមអភិបាលរង នៃគណៈអភិបាលខេត្ត ថ្នាក់ដឹកនាំមន្ទីរ អង្គភាព ព្រមទាំងមេឃុំចៅសង្កាត់ចំនួន២៥៣នាក់។
ក្នុងឱកាសនេះ ឯកឧត្តមអភិបាលនៃគណៈអភិបាលខេត្តកំពត បានមានប្រសាសន៍ថា ផ្តាំផ្ញើគ្រប់មេឃុំចៅសង្កាត់ដែលមិនទាន់ចេះស្ទាត់ក្នុងការប្រើប្រាស់Tablets ត្រូវសិក្សាបន្ថែម ព្រោះការងារកំណត់អត្តសញ្ញាណកម្មគ្រួសារក្រីក្រ មិនអាចធ្វើដោយភាពមិនច្បាស់លាស់នោះឡើយ។
រដ្ឋបាលខេត្តនឹងជំរុញដល់មន្ត្រីនៃមន្ទីរផែនការ សហការជាមួយមន្ទីរសង្គមកិច្ច អតីតយុទ្ធជន និងយុវនីតិសម្បទាចុះបង្រៀនតាមរយៈការប្រមូលផ្តុំនៅសាលាក្រុងស្រុក ដើម្បីឱ្យកិច្ចការដ៏ចាំបាច់នេះមានភាពល្អប្រសើរ និងប្រកបដោយតម្លាភាព៕
