បន្លំយកថង់ស្កគ្រាប់ វេចខ្ជប់គ្រឿងញៀន ត្រូវសមត្ថកិច្ចចាប់វាយខ្នោះ
ខេត្តកំពង់ស្ពឺ៖បញ្ជូនជនសង្ស័យម្នាក់ និងវត្ថុតាងគ្រឿងញៀនទៅ បញ្ជាការដ្ឋានកងរាជអាវុធហត្ថខេត្តកំពង់ស្ពឺ នាថ្ងៃទី៣០ ខែធ្នូឆ្នាំ២០១៩ ដើម្បីចាត់ការបន្តតាមនិតិវិធី បន្ទាប់ពីកម្លាំងកងរាជអាវុធ ដឹកនាំដោយលោកវរសេនីយ៍ត្រី យស ឌីណា មេបញ្ជាការស្រុក ចាប់ឃាត់ខ្លួនបានកាលពីថ្ងៃទី២៥ ខែធ្នូ ឆ្នាំ២០១៩ នៅចំណុចតូបលក់ដូរ ចន្លោះគីឡូម៉ែត្រលេខ92-93 ស្ថិតភូមិចំការចេក ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
សមត្ថកិច្ចបានឲ្យដឹងថា ជនសង្ស័យមានឈ្មោះ សេង សាវឿន ហៅ (ឈីញ)ភេទប្រុស អាយុ២១ឆ្នាំ មុខរបរ បើកបររថយន្ត(បែនដឹកដី) ស្នាក់នៅភូមិ ឃុំខាងលើ។
វត្ថុតាងដកហូតបានរួមមាន៖ម្សៅក្រាមពណ៌ស សរុបចំនួន (១៩៥កញ្ចប់)ដែលដាក់បន្លំក្នុងស្រោមស្ករគ្រាប់ និងកិបក្នុងលុយ,ដងខ្សៀសម្រាប់ជក់ ធ្វើអំពីកែវចំនួន២១ខ្សៀ,ទូរស័ព្ទប្រភេទ oppo ពណ៌ស្វាយចំនួន០១គ្រឿង,ចិញ្ជៀន (ចំនួន២វង់) ត្បូងពណ៌ខ្មៅ ចំនួន០១និង ចិញ្ជៀនរូបក្ងោក លោហៈធាតុ ពណ៌ក្រហម១វង់, ខ្សែក ពណ៌ក្រហមមានត្បូងខ្មៅ ០១ខ្សែ,ខ្សែដៃលោហៈធាតុពណ៌ក្រហម០១ខ្សែ,នាឡិកាដៃពណ៌ក្រហម ខ្សែស្បែក០១ខ្សែ, ប្រាក់រៀល ចំនួន៧៥០០០រៀល,ថង់សម្រាប់ច្រកមួយចំនួនទៀត៕