គយ និងអាវុធហត្ថ ចាប់បានបារីជាងមួយពាន់ប៊ិច លាក់ក្នុងកុងតឺន័រ
ខេត្តព្រះសីហនុ៖ថ្នាំជក់(បារី) ជាងមួយពាន់ប៊ិច លាក់ក្នុងកុងតឺន័រត្រូវបានមន្ត្រីគយចល័តតំបន់៣ សហការជាមួយកងរាជអាវុធហត្ថស្នាក់ការ៤០២ ប្រចាំផ្លូវជាតិលេខ៤ ចុះបង្ក្រាបបានកាលពីថ្ងៃទី២៩ ខែធ្នូ ឆ្នាំ២០១៩ ខណ:ដែលកំពុងដឹកជញ្ជូនតាមបណ្តោយផ្លូវជាតិលេខ៤។
បើតាមសមត្ថកិច្ខបានឲ្យដឹងថា កិច្ចប្រតិបត្តការណ៍នេះបានធ្វើឡើងដោយមានការសហការគ្នាពីកម្លាំងកងរាជអាវុធហត្ថស្នាក់ការសន្តិសុខ៤០២ និងកម្លាំងគយចល័តតំបន់៣ ដឹកនាំដោយលោក កែវ អង្កាម ប្រធានការិយាល័យស្រាវជ្រាវ និងបង្ក្រាបអំពើរត់ពន្ធតំបន់៣ បានឃាត់រថយន្តមួយគ្រឿងម៉ាក Fuso ពណ៌ស ពាក់ស្លាកលេខភ្នំពេញ 3E-9030 សណ្តោងកុងទីន័រមានដឹកបារីខុសច្បាប់ជាង១ពាន់ប៊ិច។
វត្ថុតាងដែលដកហូតបានរួមមាន:បារី ម៉ាក Z8,បារី ម៉ាក WL 03,បារីម៉ាក76 សរុបទាំងអស់ចំនួន១១៦០ប៊ិច ដោយគ្មានបិទតែម គ្មានឯកសារបង់ពន្ធគយនាំចូល និងមិនមានឯកសារពាក់ព័ន្ធផ្សេងទៀតនោះឡើយ។
បច្ចុប្បន្ន វត្ថុតាងទាំងអស់ ត្រូវបានយកទៅរក្សាទុកនៅស្នាក់ការគយ និងរដ្ឋាករស្រុកស្រែអំបិល ដើម្បីចាត់ការបន្តតាមនីតិវិធី៕