អភិបាលខេត្តស្វាយរៀង ប្រគល់Tablets ជូនដល់ឃុំសង្កាត់ក្នុងខេត្ត សម្រាប់អនុវត្តកម្មវិធីឧបត្ថម្ភសាច់ប្រាក់ជូន ស្ត្រីមានផ្ទៃពោះ និងកុមារអាយុក្រោម២ឆ្នាំ
ខេត្តស្វាយរៀង៖ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀងនាព្រឹកថ្ងៃចន្ទ ៥កើត ខែបុស្ស ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៣០ ខែធ្នូ ឆ្នាំ២០១៩នេះ បានអញ្ជើញជាអធិបតី ក្នុងពិធីប្រគល់Tablets ជូនដល់ឃុំ សង្កាត់ក្នុងខេត្តស្វាយរៀង សម្រាប់អនុវត្តកម្មវិធីឧបត្ថម្ភសាច់ប្រាក់ជូន ស្ត្រីមានផ្ទៃពោះ និងកុមារអាយុក្រោម២ឆ្នាំ និងការកំណត់អន្តសញ្ញាណកម្មក្រីក្រតាមការស្នើសុំ។
ក្នុងឱកាសនោះលោក ថោង សាមាន ប្រធានមន្ទីរផែនការខេត្តស្វាយរៀងបានបញ្ជាក់ថា ដើម្បីអនុវត្តអោយបានត្រឹមត្រូវ មានសង្គតិភាព មានប្រសិទ្ធភាព និងប្រើប្រាស់បានយូ ឃុំសង្កាត់នីមួយៗ ដែលទទួលបានTablets ១គ្រឿង ក្នុង១ឃុំសង្កាត់សរុប៨០គ្រឿង សម្រាប់ប្រើប្រាស់អនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារក្រោមអាយុ២ឆ្នាំ និងការកំណត់អន្តសញ្ញាណកម្មគ្រួសារក្រីក្រតាមការស្នើសុំ ត្រូវប្រើប្រាស់អោយបានត្រឹមត្រូវ និងថែរក្សាអោយបានល្អប្រសើរ។
ចំពោះការប្រើប្រាស់Tablets នេះ គឺជាការខ្ចីយកទៅប្រើប្រាស់បណ្តោះអាសន្នតែប៉ុណ្ណោះ ព្រោះស្ថិតនៅក្នុងការចុះបញ្ជីសារពើភណ្ឌ របស់មន្ទីរសង្គមកិច្ច អតីតយុទ្ធជន និងយុវនិតិសម្បទាខេត្តស្វាយរៀង។
ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង មានប្រសាសន៍ថ្លែងនូវការអរគុណចំពោះវត្តមាន លោក លោកស្រី ពិសេសមន្ត្រីទទួលបន្ទុកកិច្ចការផ្តល់សេវាជូនស្ត្រីមានផ្ទៃពោះ និងកុមារអាយុក្រោម២ឆ្នាំ នៃគ្រូសារក្រីក្រ ស្របតាមគោលនយោបាយគាំពារសង្គម(២០១៦-២០២៥)របស់រាជរដ្ឋាភិបាល។
ហើយការចែកជូននូវ Tabletsទៅដល់ឃុំ សង្កាត់ទាំង៨០ នៅក្នុងខេត្តស្វាយរៀងនាពេលនេះ ជាបរិបទមួយដ៏សំខាន់ក្នុងការជម្រុញ និងលើកកម្ពស់ទៅដល់ការផ្តល់សេវាជូនដល់ក្រុមគោលដៅ នៃគ្រួសារក្រីក្រ សម្រាប់ផែនទីមគ្គុទេ្ទសក៍ រយះពេលវែង សម្រាប់ការកែទម្រង់ និងការអភិវឌ្ឍប្រព័ន្ធគាំពារសង្គមនៅកម្ពុជា។
តាមរយះការដាក់ចេញនូវផែនទីយុទ្ធសាស្ត្រ ធានាអោយបាននូវសន្តិសុខប្រាក់ចំណូល កាត់បន្ថយភាពងាយរងគ្រោះផ្នែកសេដ្ឋកិច្ច និងហិរញ្ញវត្ថុរបស់ប្រជាជន ព្រមទាំងលើកកម្ពស់សុខមាលភាព សមធម៌ សាមគ្គីភាព និងភាពសុខដុមរមនានៅក្នុងសង្គមជាតិ ដូចជាកម្មវិធីឧបត្ថមសាច់ប្រាក់ ជូនស្រ្តីមានផ្ទៃពោះ និងកុមារក្រោមអាយុ២ឆ្នាំ គឺជាកិច្ចការអាទិភាពមួយក្នុង ចំណោមកិច្ចការអាទិភាពផ្សេងទៀត ដែលត្រូវអនុវត្តមុនគេ៕