រថយន្តយីឌុប១គ្រឿង ដឹកឈើខុសច្បាប់ ទំនងជាធ្ងន់ពេក ក្រឡាប់ធ្លាយចេញឈើ រាយប៉ាយពេញផ្លូវ
ខេត្តមណ្ឌលគិរី៖តាមសេចក្តីរាយការបានឲ្យដឹងថា រថយន្តយីឌុប១គ្រឿងក្នុងចំណោមរថយន្ត៥គ្រឿងផ្សេងទៀត ជាកម្មសិទ្ធរបស់ថៅកែដេញថ្លៃ(ជំនាញមិនប្រាប់ឈ្មោះ) រស់នៅខេត្តកំពង់ធំ ដឹកឈើខុសច្បាប់ ទំនងជាធ្ងន់ពេក បានក្រឡាប់ធ្លាយចេញឈើរាយប៉ាយពេញផ្លូវ តែសំណាងតៃកុងមិនរងរបួស។
ករណីនេះបានកើតឡើងកាលពីវេលាម៉ោង១១យប់ ថ្ងៃទី២៧ខែធ្នូឆ្នាំ២០១៩ នៅចំណុចហួសផ្លូវបំបែកប៊ូស្រា ស្ថិតនៅក្នុងភូមិពូលុង សង្កាត់រមនា ក្រុងសែនមនោរម្យ ខេត្តមណ្ឌលគិរី។
បើតាមប្រភពព័ត៌មានបានឲ្យដឹងថា កាលពីថ្ងៃ ខែ កើតហេតុខាងលើមានរថយន្តចំនួន៥គ្រឿង បានប្រមូលឈើដែលដេញថ្លៃបាន និងថាបង់ពន្ធជូនក្រសួងសេដ្ឋកិច្ចនិងហេរញ្ញវត្ថុ រួចហើយនោះពីចំណុចប៉ុស្តិ៍នគរបាលក្រង់តេះនិងវ៉ាយោងស្ថិតក្នុងស្រុកពេជ្រាដា។
មន្ត្រីបរិស្ថានថា បុគ្គលជាអ្នកដេញថ្លៃឈើដែលបង្ក្រាបបានកាលពីពេលកន្លងមកនោះ គឺដេញបានចំនួន១៥៣៨ម៉ែត្រគូប មាននៅ(ប៉ុស្តិ៍ក្រង់តេះ ស្នាក់ការវ៉ាយោង ដីខ្មៅ ណាមរ៉ាម)។
ពាក់ពន្ធ័បញ្ហានេះដែរសង្គមស៊ីវិលចង់ឃើញ ការដេញថ្លៃ និងដឹកជញ្ជួននេះ មានភាពល្អឥតខ្ចោះជាងនេះ ព្រោះគេទទួលព័ត៌មានថា កំពុងមានអ្នកកាសែតក្នុងខេត្តម្នាក់រត់ការរឿងដឹកឈើនេះដែរ៕