រដ្ឋបាលខេត្តស្ទឹងត្រែង រៀបចំពិធីផ្សព្វផ្សាយស្តីពីផលប៉ះពាល់ និងគ្រោះថ្នាក់ នៃការប្រើប្រាស់គ្រឿងញៀនក្រោមប្រធានបទ«ចូលរួមទាំងអស់គ្នាដើម្បីជីវិត និងសហគមន៍យើងគ្មានថ្នាំញៀន»
ខេត្តស្ទឹងត្រែង៖ឯកឧត្តម ម៉ុម សារឿន អភិបាលនៃគណៈអភិបាលខេត្តស្ទឹងត្រែង នាព្រឹកថ្ងៃព្រហស្បតិ៍ ១កើត ខែបុស្ស ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៦ ខែធ្នូ ឆ្នាំ២០១៩ បានអញ្ជើញជាអធិបតីក្នុងពិធីផ្សព្វផ្សាយស្តីពីផលប៉ះពាល់ និងគ្រោះថ្នាក់នៃការប្រើប្រាស់គ្រឿងញៀន និងច្បាប់ស្តីពីការត្រួតពិនិត្យគ្រឿងញៀន ក្រោមប្រធានបទ«ចូលរួមទាំងអស់គ្នាដើម្បីជីវិត និងសហគមន៍យើងគ្មានថ្នាំញៀន»។
ពិធីនេះប្រព្រឹត្តទៅ នៅបរិវេណសាលាឃុំអូរស្វាយ ឃុំអូរស្វាយ ស្រុកបុរីអូរស្វាយសែនជ័យ ដោយមានការចូលរួមពីសំណាក់ ថ្នាក់ដឹកនាំខេត្ត អាជ្ញាធរស្រុក មន្ទីរ អង្គភាពជុំវិញខេត្ត កងកម្លាំងប្រដាប់អាវុធ មេឃុំ លោកគ្រូ អ្នកគ្រូ សិស្សានុសិស្សសរុប៣៧១នាក់។
ឯកឧត្តម ម៉ុម សារឿន អភិបាលនៃគណៈអភិបាលខេត្ត បានមានប្រសាសន៍ថា ពិធីផ្សព្វផ្សាយនេះជាសកម្មភាពការងារដែលមានសារៈសំខាន់ និងចាំបាច់ ដើម្បីរួមគ្នាអនុវត្តឲ្យខាងតែបានក្នុងបេសកកម្មទប់ស្កាត់ និងបង្រ្កាបបទល្មើសគ្រឿងញៀន ការរួមគ្នាប្រយុទ្ធប្រឆាំងគ្រឿងញៀន និងបន្តពង្រឹងឲ្យកាន់តែរឹងមាំបន្ថែមទៀតចំពោះការអនុវត្តវិធានការច្បាប់ប្រយុទ្ធប្រឆាំងគ្រឿងញៀន។
ថ្លែងក្នុងឱកាសនោះឯកឧត្តម អភិបាលខេត្ត បានផ្តាំផ្ញើ និងណែនាំដល់បងប្អូនប្រជាពលរដ្ឋ លោកគ្រូ អ្នកគ្រូ និងសិស្សានុសិស្សទាំងអស់ ត្រូវមានការប្រុងប្រយ័ត្នខ្ពស់ចំពោះការបញ្ចុះបញ្ចូល ពីជនអគតិមួយចំនួនដែលតែងតែបោកបញ្ឆោតឱ្យប្រព្រឹត្តនូវអំពើខុសច្បាប់ ជាពិសេសការប្រើប្រាស់នូវសារធាតុញៀន៕