បញ្ជូនខ្លួនជនសង្ស័យប្រុស ស្រីចំនួន០៣នាក់ ទៅសាលាដំបូងខេត្តព្រះសីហនុ ពាក់ព័ន្ធករណីប្រើហិង្សា លើអ្នកកាន់កាប់អចលនវត្ថុ
ខេត្តព្រះសីហនុ៖ជនសង្ស័យ ប្រុស ស្រីចំនួន០៣នាក់ ដែលជាប់ពាក់ព័ន្ធករណីប្រើហិង្សាទៅលើអ្នកកាន់កាប់អចលនវត្ថុដោយសុចរិត បំផ្លិចបំផ្លាញទ្រព្យសម្បត្តិអ្នកដទៃ និងហិង្សាដោយចេតនា ទៅលើអាជ្ញាធរមានសមត្ថកិច្ច ដែលបានចុះបង្រ្កាប ដោយយោងតាមពាក្យបណ្តឹងរបស់ឈ្មោះ មិក សាផាណា ភេទប្រុស អាយុ៤៧ឆ្នាំ ជនជាតិខ្មែរ មុខរបរ មេធាវី មានទីលំនៅបច្ចុប្បន្ន សង្កាត់បឹងព្រលឹង ខណ្ឌ៧មករា រាជធានីភ្នំពេញ នៅចំណុចច្រាំងក្រហម ភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុកាលពីថ្ងៃទី២៤ ខែធ្នូ ឆ្នាំ២០១៩នោះ កម្លាំងការិយាល័យបទល្មើសព្រហ្មទណ្ឌ មន្ទីរយុត្តិធម៌ កងរាជអាវុធហត្ថខេត្តព្រះសីហនុ បានបញ្ជូនទៅសាលាដំបូងខេត្តព្រះសីហនុនាព្រឹកថ្ងៃទី២៦ ខែធ្នូ ឆ្នាំ២០១៩ ដើម្បីចាតការតាមនិតិវិធី។
សមត្ថកិច្ចបានឲ្យដឹងថា៖ជនសង្ស័យទាំង៣នាក់រួមមាន៖
ទី១-ឈ្មោះ ង៉ែត គ្រៀល ភេទប្រុស អាយុ៦៨ឆ្នាំ ជនជាតិខ្មែរ មុខរបរធ្វើស្រែ មានទីលំនៅ ភូមិពូធឿង ឃុំបិតត្រាំង ស្រុកព្រៃនប់។
ទី២-ឈ្មោះ សំ ពឹង ភេទស្រី អាយុ៦៩ឆ្នាំ ជនជាតិខ្មែរ មុខរបរធ្វើស្រែ មានទីលំនៅ ភូមិពូធឿង ឃុំបិតត្រាំង ស្រុកព្រៃនប់។
ទី៣-ឈ្មោះ សាយ អេង ភេទប្រុស អាយុ៣១ឆ្នាំ ជនជាតិខ្មែរ មុខរបរធ្វើចំការ មានទីលំនៅ ភូមិចំណោតរាម ឃុំបិតត្រាំង ស្រុកព្រៃនប់។
វត្ថុតាងដកហូតបានរួមមាន៖ម៉ូតូចំនួន១២គ្រឿង,កាំបិតលៀមចំនួន០៣, រណាអារឈើចំនួន០១,ម៉ាស៊ីនអារឈើចំនួន០១គ្រឿង, ពូថៅចំនួន០២,ញញូរចំនួន០១, ទូរស័ព្ទដៃចំនួន០៤គ្រឿងនិងកាំបិតបុ័ងតោ០១៕
