សាខាកាំកុងត្រូលខេត្តប៉ៃលិន បន្តចុះ ត្រួតពិនិត្យ និងណែនាំដល់អាជីវករ កុំឲ្យនាំចូលនិងដាក់តាំងទំនិញហួសកាលបរិច្ឆេទកំណត់ ដាក់លក់នៅលើទីផ្សារ
ខេត្តប៉ៃលិន៖សាខាកាំកុងត្រូលខេត្តប៉ៃលិន ដឹកនាំដោយ លោក ឈឹម វាសនា ប្រធានសាខាកាំកុងត្រូលខេត្ត សហការជាមួយមន្ទីរពាណិជ្ជកម្មខេត្ត នាថ្ងៃទី២៣ ខែធ្នូ ឆ្នាំ២០១៩ បានបន្តចុះត្រួតពិនិត្យ និងណែនាំដល់អាជីវករផ្សាប៉ាហ៊ី ស្ថិតនៅក្នុងភូមិប៉ាហ៊ី សង្កាត់ប៉ៃលិន ក្រុងប៉ៃលិន ខេត្តប៉ៃលិន មិនឲ្យដាក់តាំងលក់ទំនិញហួសសុពលភាព ខូចគុណភាព លើចំនីអារហារបរិភោគដើម្បីលើកកម្ពស់សុខមាលភាព អ្នកប្រើប្រាស់។
លោក ឈឹម វាសនា បានឱ្យដឹងថា ការទប់ស្កាត់ និងត្រួតពិនិត្យរកទំនិញ គ្មានគុណភាព ហួសកាលបរិច្ឆេទកំណត់ ប្រើប្រាស់ជាតិគីមី គឺធ្វើឡើងដោយគ្មានកាលកំណត់នោះឡើយ ដើម្បីទប់ស្កាត់ឲ្យបានកាន់តែខ្ពស់ចំពោះការចរាចរណ៍ទំនិញខូចគុណភាព និងគ្មានច្បាប់អនុញ្ញាតនៅលើទីផ្សារ ដែលជាហេតុនាំឲ្យប៉ះពាល់ដល់សុខភាពរបស់ប្រជាពលរដ្ឋ។
លោកបានបន្តថា ទំនិញដែលមន្រ្តីរបស់លោកតែងធ្វើសកម្មភាពពិនិត្យជាប្រចាំ គឺពិនិត្យទៅកាលបរិច្ឆេទ លើសំបកវិចខ្ចប់ រួមទាំងពិនិត្យរកសារជាតិគីមីនៅលើបន្លែត្រីសាច់ ជាដើម ដើម្បីចូលរួមចំណែកទប់ស្កាត់ចរាចរណ៍ទំនិញដែលខូចគុណភាព និងមានសារធាតុគីមី ជាពិសេសបានធ្វើការពន្យល់ណែនាំដល់ ពលរដ្ឋនិងអាជីវករទាំងអស់ឲ្យបានយល់ដឹងពីប្រភេទទំនិញ ដែលគ្មានគុណភាពផងដែរ។
លោកបញ្ជាក់ថា ការចុះត្រួតពិនិត្យនេះដែរកម្លាំងដកហូតបានទំនិញហួសសុពលភាព និងខូចគុណភាពស្ករគ្រាបចំនួន១០៦កញ្ចប់យកទៅកម្ទេចចោលផងដែរ។
ជាមួយគ្នានោះដែរលោកក៏បានសំណូមពរដល់អាជីវករទាំងអស់ និងអ្នកប្រើប្រាស់ ត្រូវរួមគ្នាលុបបំបាត់ការដាក់តាំងលក់ និងប្រើប្រាស់ទំនិញ ខូចគុណភាព ឬទំនិញប្រើប្រាស់សារធាតុគីមី ព្រោះវាបានបង្ករផលប៉ះពាល់ខ្លាំងសម្រាប់សុខភាព និងរស់នៅជីវភាពប្រចាំថ្ងៃ៕
![]()
![]()
![]()