ចាប់ឃាត់ខ្លួនជនសង្ស័យបាញ់តដៃ កម្លាំងការិយាល័យគ្រឿងញៀន ក៦ ចំនួន២នាក់ នៅខណ្ឌទួលគោក
រាជធានីភ្នំពេញ៖ជនសង្ស័យចំនួន២នាក់ ដែលដកកាំភ្លឺងបាញ់ប្រហាទៅលើកម្លាំង ការិយាល័យគ្រឿងញៀន ក៦ ជាច្រើនគ្រាប់ សំណាងល្អមិនបណ្តាលឲ្យមានមនុស្សរងគ្រោះ ត្រូវបានចាប់ឃាត់ខ្លួនបានភ្លាមៗ កាលពីវេលាម៉ោងជាង១០យប់ ថ្ងៃទី២៣ ខែធ្នូ ឆ្នាំ២០១៩ នៅតាមបណ្តោយផ្លូវលេខ៣១៥ ស្ថិតក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។
ពាក់ពន្ឋ័ករណីបាញ់តដៃគ្នាជាច្រើនគ្រាប់រវាងជនសង្ស័យ និងកម្លាំងការិយាល័យគ្រឿងញៀន ក៦ បើតាមកម្លាំងការិយល័យគ្រឿងញៀន ក៦ បានឲ្យដឹងថា ជនសង្ស័យមានឈ្មោះ គិត ម៉េងលី ភេទប្រុស អាយុជាង២០ឆ្នាំ និងទី២៖ ឈ្មោះ មាស សីលា ហៅអាទាល់ ភេទប្រុសអាយុជាង២០ឆ្នាំ។
សមត្ថកិច្ចបន្តថា៖មុនកើតហេតុគឺកម្លាំងបានតាមមុខសញ្ញា ៤ ទៅ៥នាក់ ចេញពីម្តុំពេទ្យលោកសង្ឃ ខណៈកំពុងតាម ជនសង្ស័យដឹងខ្លូនបានជិះម៉ូតូគេចពីកម្លាំងតាមផ្លូវ៥៩៨ បត់មកផ្សារមាន់អាំង លុះបត់បានបន្តិចនឹងមានការជិះប្រដេញពីកម្លាំងនគរបាលផង ជនសង្ស័យបានបត់ម៉ូតូចូលក្នុងផ្ទះរួចដកកាំភ្លើង បាញ់មកលើកម្លាំងនគរបាលជាច្រើនគ្រាប់តែមិនត្រូវ ហើយកម្លាំងនគរបាលបានរត់គេចចេញពីគ្រាប់កាំភ្លើង។
រីឯជនសង្ស័យបានរត់ចូលក្នុងផ្ទះក្រោយមកត្រូវបាន កម្លាំងការិយាល័យគ្រឿងញៀនក៦ ហៅខាងកម្លាំងខណ្ឌទួលគោក មកជួយឡោមព័ទ្ធចាប់បាន២នាក់ ដកហូតបានអាវុធខ្លីមួយដើម និងសំបកគ្រាប់ដែលបាញ់រួចមួយចំនួនផងដែរ។
ក្រោយកើតហេតុជនសង្ស័យទាំង២នាក់ ត្រូវបានបញ្ជូនទៅសាកសួរនៅខាងការិយាល័យគ្រឿងញៀន ក៦ ដើម្បីកសាងសុំណុំរឿងចាត់ការតាមនិតិវិធី៕