ខេត្តកំពតប្រារព្ធពិធីដាំដើមឈើ ដើម្បីអបអរព្រឹត្តិការណ៍ បុណ្យសមុទ្រលើកទី៨ ជុំទី២
ខេត្តកំពត៖ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មការអន្តរក្រសួង ឯកឧត្តម ជាវ តាយ អភិបាលនៃគណៈអភិបាលខេត្តកំពត និងលោកជំទាវ ឯកឧត្តម ជឹង ផល្លា ប្រធានក្រុមប្រឹក្សាខេត្ត និងលោកជំទាវ បានអញ្ជើញជាអធិបតីក្នុងពិធីដាំដើមឈើ ដើម្បីអបអរព្រឹត្តិការណ៍បុណ្យសមុទ្រលើកទី៨ ជុំទី២ នៅខេត្តកំពត នាព្រឹកថ្ងៃសុក្រ ៩រោច ខែមិគសិរ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២០ ខែធ្នូ ឆ្នាំ២០១៩។
ក្នុងនោះក៏មានការអញ្ជើញចូលរួមពីថ្នាក់ដឹកនាំក្រសួង មន្ទីរ អង្គភាព មន្ត្រីរាជការ កងកម្លាំងប្រដាប់វុធ សិស្ស និស្សិត ប្រជាពលរដ្ឋមូលដ្ឋាន សរុបប្រមាណ៣០០នាក់។
ឯកឧត្តម ជាវ តាយ អភិបាលនៃគណៈអភិបាលខេត្តកំពតបានមានប្រសាសន៍ថា នៅពេលខាងមុខ រដ្ឋបាលខេត្តកំពតនឹងរៀបចំឱ្យមានសួនអនុស្សាវរីយ៍អាពាហ៍ពិពាហ៍ ដើម្បីផ្តល់ឱកាសចំពោះគូស្រករដែលត្រូវរៀបអាពាហ៍ពិពាហ៍ ដាំដើមឈើយ៉ាងហោចឱ្យបានពីរដើមទុកជាអនុស្សាវរីយ៍ និងប្រយោជន៍ទៅអនាគត។
ឆ្លើយតបចំពោះគំនិតផ្តួចផ្តើមដ៏ថ្លៃថ្លាខាងលើ ឯកឧត្តមបណ្ឌិត ថោង ខុន បានមានប្រសាសន៍ថា នេះជាការយកចិត្តទុកដាក់ប្រកបដោយគតិឧត្តុង្គឧត្តម បំណងប្រែក្លាយដែនដីឱ្យមានភាពបៃតង ស្របតាមទស្សនវិស័យរបស់រាជរដ្ឋាភិបាលដែលបានកំណត់។ក្នុងនាមក្រសួងទេសចរណ៍ ឯកឧត្តមសូមគាំទ្រនូវការបង្កើតសួនអនុស្សាវរីយ៍អាពាហ៍ពិពាហ៍របស់រដ្ឋបាលខេត្ត។
សូមបញ្ជាក់ផងដែរថា សម្រាប់ពិធីដាំដើមឈើអបអរព្រឹត្តិការណ៍បុណ្យសមុទ្រលើកទី៨នេះ គឺអ្នកចូលរួមដាំដើមរំដួលចំនួន១៦៧ដើម ហើយថ្នាក់ដឹកនាំបានដាំដើមគីនិន៦ដើម និងដើមនាងនួនចំនួន៦ដើម៕
.jpg)
