លោកឧត្តមសេនីយ៍ត្រី អ៊ី ចំរើន នាយប៉ុស្តិ៍នគរបាលអន្តោប្រវេសន៍ថ្មី ក្រុងប៉ោយប៉ែត ប្តេជ្ញាចិត្តបម្រើសេវាសាធារណៈជូនភ្ញៀវជាតិ អន្តរជាតិ ឲ្យទាន់ពេលវេលា និងប្រកបដោយប្រសិទិ្ធភាព
ខេត្តបន្ទាយមានជ័យ៖អតីតនាយប៉ុស្តិ៍ច្រកទ្វាព្រំដែនអន្តរជាតិ អូរយ៉ាដាវ នៃនាយកដ្ឋានច្រទ្វារទី២ លោកឧត្តមសេនីយ៍ត្រី អ៊ី ចំរើន អត្តលេខ៥៨៥៨១ បានប្តេជ្ញាចិត្តដឹកនាំអង្គភាពឲ្យរីកចម្រើន គោរពច្បាប់ បទបញ្ជាផ្ទៃក្នុង វិន័យកងកម្លាំង គោរពមេកើយតាមឋានានុក្រម និងប្តេជ្ញា បម្រើសេវាសាធារណៈជូនភ្ញៀវជាតិ-អន្តរជាតិ ឲ្យទាន់ពេលវេលា និងប្រកបដោយប្រសិទិ្ធភាព។
លោកឧត្តមសេនីយ៍ត្រី ប្តេជ្ញាចិត្តបែបនេះក្នុងឱកាសដែលលោកត្រូវបានសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្រេចផ្ទេភារកិច្ច និងតែងតាំងមុខតំណែងជានាយប៉ុស្តិ៍នគរបាលច្រកទ្វារព្រំដែន អន្តរជាតិប៉ោយប៉ែត នៃនាយកដ្ឋានច្រកទ្វារទី១ ខណៈដែលលោកវរសេនីយ៍ឯក ខឹម ចិត្ត្រា នាយប៉ុស្តិ៍ច្រកទ្វារព្រំដែន អន្តរជាតិប៉ោយប៉ែត ត្រូវបានផ្ទេរភារកិច្ចឲ្យទៅបម្រើការងារ ជានាយប៉ុស្តិ៍ច្រកទ្វារព្រំដែនអន្តរជាតិអូរយ៉ាដាវ ខេត្តរតនគីរីវិញ។
សូមជំរាបដែរថា ពិធីប្រកាសផ្ទេភារកិច្ច និងតែងតាំងមុខតំណែងជានាយប៉ុស្តិ៍នគរបាលអន្តោប្រវេសន៍នេះ បានធ្វើឡើងនារសៀលថ្ងៃសុក្រ ៩រោច ខែមិគសិរ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២០ ខែធ្នូ ឆ្នាំ២០១៩ នៅទីស្នាក់ការប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត ក្រោមអធិបតីភាព នាយឧត្តមសេនីយ៍ ឃុន សំបូរ អគ្គនាយករង នៃអគ្គនាយកដ្ឋាននគរបាលអន្តោប្រវេសន៍ លោក ង៉ោ ម៉េងជ្រួន អភិបាលរងខេត្តបន្ទាយមានជ័យ តំណាងឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ លោក មាស ច័ន្ទពិសិដ្ឋ ព្រះរាជអាជ្ញារងអមសាលាដំបូងខេត្ត និងមានការអញ្ជើញចូលរួមពីលោក លោកស្រី មន្ត្រីរាជការ ស្ថាប័នពាក់ពន្ធ័យ៉ាងច្រើនកុះករផងដែរ។
ថ្លែងនាឱកាសនោះដែរនាយឧត្តមសេនីយ៍ ឃុន សំបូរ បានមានប្រសាសន៍ ផ្ដាំផ្ញើទៅដល់លោកនាយប៉ុស្តិ៍ទាំងពីរត្រូវយកចិត្តទុកដាក់និងខិតខំធ្វើការងារ ធម្មតាទេការផ្លាស់ប្ដូរទីកន្លែងការងារវាជាគោលការណ៍របស់ថ្នាក់ដឹកនាំ គឺការផ្លាស់ប្ដូរ ដើម្បីយកបទពិសោធន៍ការងារ ហើយការផ្លាស់ប្ដូរមុខតំណែងពីកន្លែងមួយទៅកន្លែងមួយ គឺជាការងារដូចគ្នានោះទេ វាសំខាន់គឺឋិតនៅលើខ្លួនយើងផ្ដល់តម្លៃឲ្យការងារ សូមឲ្យខ្លួនឯងត្រូវគិតថាយើងជាអ្នកណា និងត្រូវអនុវត្តការងារអ្វីខ្លះ ដើម្បីបម្រើប្រជាពលរដ្ឋនិងមាតុភូមិរបស់យើង៕