វេទិកាពិគ្រោះយោបល់ថ្នាក់ខេត្ត លើកទី២ ឆ្នាំ២០១៩ ជាមួយសមាគម អង្គការមិនមែនរដ្ឋាភិបាល និងសហគមន៍មូលដ្ឋាន
ខេត្តស្ទឹងត្រែង៖ឯកឧត្តម ម៉ុម សារឿន អភិបាល នៃគណៈអភិបាលខេត្តស្ទឹងត្រែង បានអញ្ជើញជាអធិបតីក្នុងវេទិកាពិគ្រោះយោបល់ថ្នាក់ខេត្ត លើកទី២ ឆ្នាំ២០១៩ ជាមួយសមាគម អង្គការមិនមែនរដ្ឋាភិបាល និងសហគមន៍មូលដ្ឋាន កាលរសៀលថ្ងៃព្រហស្បតិ៍ ៨រោច ខែមិគសិរ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៩ ខែធ្នូ ឆ្នាំ២០១៩ នៅសាលប្រជុំសាលាខេត្ត។
ក្នុងពិធីនេះក៏មានការអញ្ជើញចូលរួមពីសំណាក់ថ្នាក់ដឹកនាំខេត្ត អភិបាលរងក្រុង ស្រុក ប្រធានអនុប្រធានមន្ទីរអង្គភាពនានាជុំវិញខេត្ត មេឃុំ ចៅសង្កាត់ តំណាងអង្គការសង្គមស៊ីវិល ប្រធានសមាគម និងសហគមន៍ប្រមាណសរុប១៦៨នាក់។
ឯកឧត្តម ម៉ុម សារឿន អភិបាលនៃគណៈអភិបាលខេត្ត បានមានប្រសាសន៍ថា ការរៀបចំវេទិកាពិគ្រោះយោបល់នេះឡើង ដើម្បីពង្រឹងកិច្ចសហប្រតិបត្តិការ លើការគ្រប់គ្រងកិច្ចការសមាគម អង្គការសង្គមស៊ីវិល ក្នុងភាពជាដៃគូរវាង រដ្ឋបាលខេត្ត និងអង្គការមិនមែនរដ្ឋាភិបាល ដែលកំពុងធ្វើសកម្មភាពក្នុងខេត្តស្ទឹងត្រែង ក្នុងការរួមចំណែកអនុវត្តតាមគោលនយោបាយយុទ្ធសាស្ត្រចតុកោណតំណាក់កាលទី៤ របស់រាជរដ្ឋាភិបាល ដើម្បីឆ្លុះបញ្ចាំងពីសកម្មភាពរបស់ខ្លួនទៅតាមផែនការ និងគោរពតាមច្បាប់លក្ខខន្តិកៈស្តីពីការបង្កើតអង្គការ សមាគម នៃព្រះរាជាណាចក្រកម្ពុជា។
ឯកឧត្តមបញ្ជាក់ថា វេទិកានេះរៀបចំឡើងក្នុងគោលបំណង៖
-ធានាបាននូវការប្រតិបត្តិតាមច្បាប់ លិខិតបទដ្ឋានគតិយុត្ត និងគោលការណ៍ជាធរមានក្នុងកិច្ចប្រតិបត្តិការសកម្មភាពការងាររបស់ដៃគូអភិវឌ្ឍន៍នានាក្នុងខេត្ត។
-បង្កើនភាពស្និទស្នាល និងកិច្ចសហប្រតិបត្តិការល្អរវាងផ្នែកសាធារណៈរបស់រដ្ឋ ជាមួយនឹងសមាគម អង្គការមិនមែនរដ្ឋាភិបាល និងសហគមន៍នានា ដែលធ្វើសកម្មភាពក្នុងដែនសមត្ថកិច្ចខេត្ត។
-ក្ដាប់បាននូវវឌ្ឍនភាពការងាររបស់សមាគម អង្គការមិនមែនរដ្ឋាភិបាល និងសហគមន៍ក្នុងមូលដ្ឋាន។
-ទទួលយកនូវមតិយោបល់ សំណូមពរ សំណើ និងបញ្ហាប្រឈមនានា។ក្នុងកិច្ចប្រតិបត្តិការសកម្មភាពការងាររបស់ដៃគូអភិវឌ្ឍន៍គ្រប់ផ្នែក ដើម្បីពិនិត្យពិចារណា ដោះស្រាយតាមសមត្ថកិច្ច៕
