មន្ទីរបរិស្ថានខេត្តមណ្ឌលគិរី ប្រារព្ធពិធីចុះកិច្ចព្រមព្រៀង សហគមន៍តំបន់ការពារធម្មជាតិទាំង ១២សហគមន៍
ខេត្តមណ្ឌលគិរី៖នាព្រឹកថ្ងៃទី១៩ ខែធ្នូ ឆ្នាំ២០១៩ មន្ទីរបរិស្ថានខេត្តមណ្ឌលគិរី សហការជាមួយអង្គការនិងWWF រៀបចំពិធីចុះកិច្ចព្រមព្រៀងសហគមន៍ តំបន់ការពារធម្មជាតិទាំង១២សហគមន៍ នៃដែនជម្រកសត្វព្រៃ ស្រែពក ភ្នំព្រេច និងកែវសីមា ជាមួយអគ្គនាយកដ្ឋានសហគមន៍មូលដ្ឋាន នៃក្រសួងបរិស្ថាន ក្រោមអធិបតីភាពលោកជំទាវ ម៉ុម ថានី រដ្ឋលេខាធិការក្រសួងបរិស្ថាន ឯកឧត្តម រ័ត្ន វិរៈ អនុរដ្ឋលេខាធិការក្រសួងបរិស្ថាន លោក ឈឹម កាន អភិបាលរង នៃគណៈអភិបាលខេត្តមណ្ឌលគិរី។
ពិធីនេះប្រព្រឹត្តទៅនៅភូមិអញ្ជ័រ ឃុំសុខសាន្ត ស្រុកកោះញែក ដោយមានការអញ្ជើញចូលរួមពីមន្ទីរអង្គភាពពាក់ព័ន្ធ កងកម្លាំងប្រដាន់អាវុធ តំណាងអង្គការដៃគូរនានា និងសហគមន៍យ៉ាងច្រើនកុះករផងដែរ។
សូមបញ្ជាក់ផងដែរថា ពិធីនេះរៀបចំឡើងក្នុងគោលបំណងទី១/ ចុះហត្ថលេខាលើកិច្ចព្រមព្រៀងរវាងសហគមន៍តំបន់ការពារធម្មជាតិ ជាមួយក្រសួងបរិស្ថាន ដើម្បីផ្តល់សិទ្ធិ និងការទទួលខុសត្រូវដល់សហគមន៍ ដើម្បីឲ្យពួកគាត់រៀបចំផែនការ និងគ្រប់គ្រងធនធានធម្មជាតិនៅក្នុងសហគមន៍ ដោយនិរន្តភាពផ្អែកលើច្បាប់តំបន់ការពារធនធានធម្មជាតិ នៃព្រះរាជាណាចក្រកម្ពុជា។
ទី២/លើកកម្ពស់ស្ថាប័នសហគមន៍ឲ្យមានភាពជាម្ចាស់លើការគ្រប់គ្រងធនធានធម្មជាតិប្រកបដោយនិរន្តភាព។
ទី៣/ដើម្បីធានាសុខុមាលភាពរបស់សហគមន៍ឲ្យកាន់តែល្អប្រសើរឡើង តាមរយៈការប្រើប្រាស់ព្រៃឈើ និងជីវចម្រុះប្រកបដោយនិរន្តរភាព៕
