ឃាតករ សម្លាប់ស្ត្រីជាគ្រូបង្រៀន កាពិតជាប្តីជនរងគ្រោះសោះ
ខេត្តបាត់ដំបង៖ស្ត្រីជាគ្រូបង្រៀនម្នាក់ ដែលត្រូវបានឃាតករមិនស្គាល់មុខសម្លាប់យ៉ាងព្រៃផ្សៃនៅក្នុងព្រៃ ដោយមិនដឹកពីមូលហេតុនោះ សមត្ថកិច្ចជំនាញ នៃស្នងការដ្ឋាននគរបាលខេត្តបាត់ដំបង បានធ្វើការស្រាវជ្រាវរហូតឈានដល់ឃាត់ខ្លួនជនសង្ស័យម្នាក់ឈ្មោះ ព្រំ សួសសំណាង ភេទប្រុស អាយុ៣១ឆ្នាំ ត្រូវជាប្តីជនរងគ្រោះមកធ្វើការសាកសួរ រួចបញ្ជូនខ្លួនទៅតុលាការ។
លោកឧត្តមសេនីយ៍ត្រី ជេត វណ្ណនី ស្នងការរងទទួលផែនបានឲ្យដឹងថា បន្ទាប់ពីទទួលបានព័ត៌មានកាលពីថ្ងៃទី១៦ ខែធ្នូ ឆ្នាំ២០១៩ វេលាម៉ោង១៧ និង០០នាទី ដោយមានការភ្ញាក់ផ្អើលប្រទះឃើញសាកសពស្រី្តម្នាក់ស្លាប់នៅចំណុចឃ្លាំងផ្ទុះ ស្ថិតនៅភូមិបឹងរុន ឃុំសំឡូត ស្រុកសំឡូត ខេត្តបាត់ដំបង ដែលគេស្គាល់ថា ឈ្មោះ អ៊ូច ចាន់ថា ភេទស្រី អាយុ២៩ឆ្នាំ ជាគ្រូបង្រៀនកំរិតបឋមសិក្សានៅស្រុកសំឡូត ខេត្តបាត់ដំបង។ភ្លាមៗនោះដែរ ដោយអនុវត្តនូវបទបញ្ជារបស់ឯកឧត្តម ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង លោកបានដឹកនាំកម្លាំងនគរបាលជំនាញក្នុងផែនការងារព្រហ្មទ័ណ្ឌចុះធ្វើការស្រាវជ្រាវស៊ើបអង្កេតលើករណីនេះ ជាបន្ទាន់ដោយមានអង្គភាពជំនាញពាក់ព័ន្ធចូលរួមក្នុងការធ្វើកោសល្យវិច័យលើសាកសពដោយយកចិត្តទុកដាក់បំផុត ។
លោកស្នងការរងបញ្ជាក់បន្ថែមថា ឆ្លងតាមរយៈនៃការស្រាវជ្រាវនៅទីកន្លែងកើតហេតុ និងការធ្វើកោសល្យវិច័យលើសាកសព សមត្ថកិច្ចជំនាញបានវាយតម្លៃ និងសន្និដ្ឋានថា (មិនមានករណីរំលោភសេពសន្ថវៈ) លើរាងកាយជនរងគ្រោះនោះទេ ប៉ុន្តែជនរងគ្រោះត្រូវបានជនសង្ស័យជាប្តីប្រើប្រាស់ខ្សែរឹតករ និងមូលបំបាក់ករ រហូតដល់ស្លាប់បាត់បង់ជីវិត ដែលករណីមួយ នេះ អាចផ្តើមចេញពីរឿងគំនុំឬទំនាស់ច្រើនជាង។
ផ្អែកតាមភស្តុតាងដែលប្រមូលបានទាំងនៅទីកន្លែងកើតហេតុ និងក្រៅទីកន្លែងកើតហេតុរួមទាំងសាក្សី ជុំវិញករណីនេះផង សមត្ថកិច្ចនគរបាលឈានទៅធ្វើការឃាត់ខ្លួនឈ្មោះ ព្រំ សួសសំណាង អាយុ៣១ឆ្នាំ ត្រូវជាប្តីរបស់ជនរងគ្រោះ ដើម្បីធ្វើការសាកសួរស្រាវជ្រាវជុំវិញករណីឃាតកម្មនេះ ជនសង្ស័យរូបនៅក្រោយពីឃាត់ខ្លួន និងបានធ្វើតេស្តឃើញមានផ្ទុកនូវសារញៀននៅក្នុងខ្លួនថែមទៀត។សមត្ថកិច្ចបានឲ្យថា ក្រោយពីឃាត់ខ្លួនសមត្ថកិច្ច បញ្ជូនទៅកាន់អយ្យការអមសាលាដំបូងខេត្តបាត់ដំបងនៅថ្ងៃទី១៩ ខែធ្នូ ឆ្នាំ២០១៩ ដើម្បីបន្តតាមនិតិវិធី៕
