កម្មករជាងក្រឡឹងម្នាក់ ដេកស្លាប់លើគ្រែ ដោយសារជម្ងឺគាំងបេះដូង បង្កឲ្យមានការភ្ញាក់ផ្អើល
រាជធានីភ្នំពេញ៖បុរសជាកម្មករជាងក្រឡឹងម្នាក់ បានដេកស្លាប់លើគ្រែ បង្កឲ្យមានការភ្ញាក់ផ្អើលកាលពីវេលាម៉ោង៧និង៣០នាទីព្រឹក ថ្ងៃទីថ្ងៃទី១៨ ខែធ្នូ ឆ្នាំ២០១៩ ស្ថិតនៅឃ្លាំងសិប្បកម្មជាងក្រឡឹងនៅតាមបណ្ដោយផ្លូវ៦០ម៉ែត្រ ភូមព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
សមត្ថកិច្ចបានឲ្យដឹងថា សពជនរងគ្រោះមានឈ្មោះ រស់ សំបូរ អាយុ១៩ ឆ្នាំមុខរបរកម្មករជាងក្រឡឹង ស្នាក់នៅកន្លែងកើតហេតុមានស្រុកកំណើតនៅភូមិរកា ឃុំកំពង់ត្របែក ស្រុកកំពង់ត្របែក ខេត្តព្រៃវែង។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុកម្មករជាងក្រឡឹងធ្វើការជាមួយគ្នា ដោយមិនឃើញជនរងគ្រោះក្រោកឡើងធ្វើការក៏ស្រែកហៅ តែមិនឆ្លើយតបវិញនោះទេ ហើយក៏បានដើរទៅអង្រួនជើងនៅតែមិនភ្ញាក់ក៏ស្រែហៅគ្នីគ្នាអោយមកជួយមើល ក៏បានដឹងថា ជនរងគ្រោះដាច់ខ្យល់ស្លាប់ទៅហើយ បង្កអោយមានការភ្ញាក់ផ្អើលកើតឡើង ហើយក៏ញាប់រាយការណ៍ជូនសមត្ថកិច្ចមូលដ្ឋានដើម្បីចុះមកពិនិត្យកន្លែងកើតហេតុ នឹងទំនាក់ទំនងទៅសមត្ថកិច្ចជំនាញធ្វើកោសល្យវិច្ច័យចុះមកកន្លែងកើតហេតុផងដែរ។
ក្រោយកើតហេតុសមត្ថកិច្ចជំនាញបានមកដល់កន្លែងកើតហេតុធ្វើកុសល្យវិច្ច័យសពរួចបានបញ្ជាក់ថា ជនរងគ្រោះពិតជាស្លាប់ដោយសារគាំងបេះដូងពិតប្រាកដមែន ហើយក៏ធ្វើកំណត់ហេតុរួចប្រគល់អោយទៅសាច់ញ្ញាតិក្រុមគ្រួសារ ដឹកយកទៅស្រុកកំណើត ដើម្បីធ្វើបុណ្យតាមប្រពៃណី៕