ពលរដ្ឋលើកគ្នាទៅចាប់ដីរដ្ឋ និងដីឯកជននៅស្រុកស្វាយចេក រដ្ឋបាលខេត្តស្រុក និងព្រៃឈើបានបញ្ជូនមន្ត្រីចុះពិនិត្យបន្ទាន់
ខេត្តបន្ទាយមានជ័យ៖គណៈបញ្ជាការការរដ្ឋបាលខេត្តបន្ទាយមានជ័យ កាលពីថ្ងៃទី១៧ ខែធ្នូ ឆ្នាំ២០១៩ បានបញ្ជូនលោកឈុន ប៊ុនថា នាយកទីចាត់ការអន្តរវិស័យសាលាខេត្ត លោក ជា ផល្លី នាយខ័ណ្ឌរដ្ឋបាលព្រៃឈើបន្ទាយមានជ័យ លោកសារ៉ាយ ពេទ្យ អភិបាលស្តីទីស្រុកស្វាយចេក និងមន្ត្រីអាអាជ្ញាធរ សមត្ថកិច្ចកងកម្លាំងចុះពិនិត្យជាក់ស្តែង ស្រាវជ្រាវបន្ទាន់ បន្ទាប់ពីប្រជាពលរដ្ឋរាប់រយពាន់នាក់ត្រូវមេខ្យល់បំផុស បានលើកគ្នាពេញបន្ទុកទៅចាប់ដីទ្រព្យសម្បត្តិរដ្ឋ និងដីកម្មសិទ្ធិឯកជន នៅឃុំស្លក្រាម និងឃុំតាបែន ស្រុកស្វាយចេកយ៉ាងអាណាធិបតេយ្យ។
ពលរដ្ឋស្លៀកពាក់ស៊ីវិល និងស្លៀកពាក់ដូចកងទ័ពខ្លះបានប្រាប់អ្នកយកព័ត៌មានឲ្យដឹងថា ពួកគាត់មកគ្រប់ខេត្តមានខេត្តកំពត កំពង់ធំ សៀមរាប ប៉ៃលិន បាត់ដំបង និងខេត្តបន្ទាយមានជ័យ រួមទាំងនៅឃុំសឹង្ហ ស្រុកអូរជ្រៅ មកពីក្រុងសិរីសោភ័ណ មកពីឃុំនានាក្នុងស្រុកស្វាយចេកផងដែរ។
ពួកគេបានមកតាមកាបំផុសពីមេខ្យល់ឲ្យមកចាប់កាន់កាប់ដីនៅចំណុចដីរដ្ឋ នៃស្ថានីយ៍ផ្សព្វផ្សាយ និងស្តារព្រៃឈើតាបែន២ ស្ថិតក្នុងភូមិសាស្ត្រ ឃុំស្លក្រាម និងឃុំតាបែន ស្រុកស្វាយចេក។
លោកប្រាក់ ចំណាន នាយផ្នែករដ្ឋបាលព្រៃឈើថ្មពួក បានប្រាប់ថា ដីរដ្ឋនៃស្ថានីយ៍ផ្សព្វផ្សាយ និងស្តារព្រៃឈើតាបែន២ មានទំហំ៥.០០០ហិចតា ប៉ុន្តែបានកាត់ឆ្វៀលស្បែកខ្លាជូនពលរដ្ឋអាស្រ័យផលជាក់ស្តែងនិងធ្វើប្លង់ដីជូនក្នុងបទបញ្ជាបប០១ នៃគោលនយោបាយចាស់សកម្មភាពថ្មីរបស់រាជរដ្ឋាភិបាលកាលពីឆ្នាំ២០១២ អស់ភាគច្រើន ហើយនៅសល់តែ១.៤០០ហិចតាដែលគ្រប់គ្រងដោយរដ្ឋ និងប្រគល់ឲ្យដៃគូដាំព្រៃឈើ ដាំកោស៊ូ និងដាំដំណាំកសិឧស្សាហកម្មឡើងវិញ ប៉ុន្តែពីខែមីនាឆ្នាំ២០១៩មក ដីរដ្ឋនេះបានរងការចូលទន្ទ្រានរានកាន់កាប់ ដោយខុសច្បាប់ពីក្រុមជនអាណាធិបតេយ្យជាច្រើនក្រុមក្រោមការបំផុសពីមេខ្លោង។
ចំណែកលោកសារ៉ាយ ពេក អភិបាលស្តីទីស្រុកស្វាយចេកបានថា ពលរដ្ឋរាប់រាយពាន់នាក់ ក្នុងក្រុមផ្សេងៗគ្នា ទាំងនោះមកទល់ពេលនេះបានលើកគ្នាមករំលោភកាន់កាប់មិនត្រឹមតែដីស្ថានីយ៍ព្រៃឈើរដ្ឋប៉ុណ្ណោះទេតែក៏បានរាលដាល់ដល់ដីកម្មសិទ្ធិឯកជន ដែលមានប័ណ្ណសម្គាល់អចលនវត្ថុថែមទៀត។
ពលរដ្ឋអាណាធិបតេយ្យទាំងនោះ បានបន្សាបឥទ្ធិពលអំណាចអាជ្ញាធរមានសមត្ថកិច្ចសាធារណៈ ដោយពួកគេធ្វើអ្វីៗស្រេចតែចិត្ត ហើយតាំងតំបន់អប្បគមន៍មិនឲ្យមន្ត្រីអាជ្ញាធរ សមត្ថកិច្ចចូលធ្វើការងាររដ្ឋបាល ធ្វើអត្តសញ្ញាណកម្ម និងធ្វើការងារសន្តិសុខក្នុងខ្លួនដែលពួកគេបានបោះបង្គោល សង់សំណង់រាប់រយ និងតាំងលក់សម្ភារៈសំណង់បម្រើឲ្យសកម្មភាពខុសច្បាប់នោះថែមទៀត។
យោងកិច្ចប្រជុំបន្តបន្ទាប់លើការសម្របសម្រួលដោះស្រាយដីធ្លីដែលបង្វែរឲ្យសមត្ថកិច្ចក្រុមប្រឹក្សាស្តារ និងអភិវឌ្ឍន៍កសិកម្មនិងជនបទ ឯកឧត្តម អ៊ុំ រាត្រី តំណាងរដ្ឋបាលខេត្តបន្ទាយមានជ័យ ក៏ដូចមន្ត្រីពាក់ព័ន្ធ ក៏ដូចពលរដ្ឋ សមត្ថកិច្ចនិងការស្រាវជ្រាវនានាបានចង្អុរបង្ហាញថា មេខ្លោងបំផុសពលរដ្ឋមកចាប់ដីរដ្ឋ និងដីឯកជននៅស្រុកស្វាយចេកនោះ គឺលោកតួ ធានទឺ ទីប្រឹក្សាអ្នកធំនៅក្រុមប្រឹក្សាស្តារ និងអភិវឌ្ឍន៍កសិកម្មនិងជនបទ។និងក៏មានមេខ្យល់ដូចជាលោកតួ សិញហិញ ប្អូនលោកតួ ធានទឺ លោកកើត ណូត លោកនីវ ឡង លោកង៉ិន សុធី លោកមុយ ឃឹតចាន់រី ជាដើម ។
មេខ្លោង និងមេខ្យល់ទាំងនោះបានបំផុសឲ្យពលរដ្ឋ កងទ័ព កងនគរបាល មន្ត្រីរាជការចូលនិវត្តន៍ លើកគ្នាមកចាប់ដីដូចខាងលើក្នុងរូបមន្តយកជាដីលំនៅឋានដីបង្កបង្កើនផលក្នុងទំហំផ្សេងៗ។ ក្នុងនោះថា បើចាប់ដីបាន៣ហិចតា មេខ្លោងនឹងយក១ហិចតា និងយកលុយក្នុងតម្លៃណាមួយ។
នេះក៏បានត្រូវចាត់តាំងឲ្យធ្វើសំណើសុំទៅថ្នាក់លើ ហើយក្រុមប្រឹក្សាស្តារនិងអភិវឌ្ឍន៍កសិកម្ម និងអភិវឌ្ឍន៍ជនបទក៏បានបញ្ជូនប្រតិភូចុះទៅដោះស្រាយទំនាស់ដីធ្លីនិងសំណើសុំកាន់កាប់ដីរដ្ឋ នៃស្ថានីយ៍ព្រៃឈើនោះជាបន្តបន្ទាប់។មកទល់ពេលនេះ ក្រុមមនុស្សទាំងនោះបានរំលោភចូលកាន់កាប់ពេញលើដីព្រៃ និងដីដាំដុះនៃស្ថានីយ៍ព្រៃឈើរដ្ឋ និងដីកម្មសិទ្ធិឯកជនដូចខាងលើ។
ចំពោះវិធានការរបស់អាជ្ញាធរដែនដីសមត្ថកិច្ចជំនាញនិងតុលការវិញគឺបានធ្វើជាបន្តបន្ទាប់ដូចជាវិធានការរដ្ឋបាលរបស់ក្រសួងមហាផ្ទៃ និងរដ្ឋបាលដែនដី វិធានការតុលាការដោយបានចេញដីការចាប់ខ្លួនមេខ្លោង និងមេខ្យល់បំផុសញុះញង់ហើយដែរ។
ប៉ុន្តែមន្ត្រីថ្នាក់ក្រោមបែរជាអនុវត្តមិនបានដោយសំណុំរឿងត្រូវរារាំងដោយស្ថាប័នថ្នាក់លើទៅវិញ ។ក្នុងវិដេអូឃ្លីបមួយលោកតួ ធានទឺ ទីប្រឹក្សាអ្នកធំបានដេកអង្រឹង ហើយនិយជាមួយពលរដ្ឋមកចាប់ដីថា លោកជាអ្នកដឹកនាំរដ្ឋតាមពិតមិនត្រូវមកផ្ទាល់ដូច្នេះទេ ប៉ុន្តែឃើញបងប្អូនមិនចេះរកលុយមានរបស់មិនចេះយក ហើយមកជួបផ្ទៃក្នុងបងប្អូន ក្រុមគ្រួសារក្រៅផ្លូវការ មិនឲ្យមន្ត្រីសមត្ថកិច្ចមកចូលរួមដាច់ខាត។លោកថា អ្នកណាស្គាល់លោក ឲ្យហៅមកចាប់ដីយកចែកគ្នា ចែកលោក ហើយលោកនឹងទិញម៉ូតូ២០គ្រឿង ទិញឡានចែកនិងបាញ់ឡូហ្គោសម្គាល់ក្រុមលោក គឺឃើញតែរបស់ ដូចឃើញលោកមកអីចឹងផងដែរ៕