រថយន្តដឹកប្រេងក្រុមហ៊ុន SAVIMEX បើកបុកម៉ូតូ រងរបួសធ្ងន់ រួចរ៉េចង្កូតបុកកន្លែងលក់សាំង សំណាងមិនផ្ទុះឆេះ
រាជធានីភ្នំពេញ៖ឧបទ្ទវហេតុគ្រោះថ្នាក់ចរាចរណ៍ដ៏រន្ធត់មួយបានកើតឡើង ដោយរថយន្តដឹកប្រេងរបស់ក្រុមហ៊ុន SAVIMEX បានបុកម៉ូតូ បណ្តាលឲ្យរបួសធ្ងន់ រួចរ៉េចង្កូតទៅបុកកន្លែងលក់សាំងមួយកន្លែងទៀតសំណាងមិនផ្ទុះឆេះ ប៉ះពាល់ដល់អ្នកដទៃ គ្រាន់តែខ្ទេចតូបលក់សាំងនិងរបស់របរ ប្រជាពលរដ្ឋនៅលើចិញ្ចើមផ្លូវ ខ្ទេចខ្ទាតរប៉ាត់រប៉ាយតែប៉ុណ្ណោះ។
ហេតុការណ៍នេះបានកើតកាលពីរសៀល ថ្ងៃទី១២ ខែធ្នូ ឆ្នាំ២០១៩ នៅលើផ្លូវ៥០ម៉ែត្រ ស្ថិតនៅភូមិអន្លង់គង សង្កាត់ព្រៃស ខណ្ឌដង្កោ រាជធានីភ្នំពេញ។
សមត្ថកិច្ចបានឲ្យដឹងថា៖មុនពេលកើតហេតុគេបានឃើញ បុរសម្នាក់បានជិះម៉ូតូឌ្រីមសង់១គ្រឿង ធ្វើដំណើរក្នុងទិសដៅពីជើងទៅត្បូង លុះមកដល់ចំណុចកើតហេតុ ស្រាប់តែមានរថយន្តដឹកប្រេងរបស់ក្រុមហ៊ុន Savimex ១គ្រឿង ពាក់ស្លាកលេខក5992 ភព3 បើកបរស្របទិសគ្នាជាមួយម៉ូតូ ក្នុងល្បឿនយ៉ាងលឿន ហើយដោយជាន់ហ្វ្រាំងមិនស៊ីបានជ្រុលបុកម៉ូតូពីក្រោយ បណ្តាលអោយអ្នកជិះម៉ូតូបានរងរបួសធ្ងន់បញ្ជូនទៅកាន់មន្ទីរពេទ្យ។
ចំណែករថយន្តនៅមិនទាន់អស់ល្បឿនបានរេចង្កូតមកស្តាំដៃទៅបុកចូលផ្ទះប្រជាពលរដ្ឋ បណ្តាលឲ្យក្បាលរថយន្តគៀបជាប់ជាមួយជញ្ជាំងផ្ទះបន្តដំណើរទៅមុខលែងរួច។
ភ្លាមៗនោះដោយមើលឃើញសភាពអ្នកជិះម៉ូតូរងរបួសធ្ងន់ តៃកុងរថយន្តបានចុះពីលើករថយន្តរត់គេចខ្លួនបាត់ស្រមោល ដោយបន្សល់ទុកចោលរថយន្តនៅកន្លែងកើតហេតុ។ក្រោយពីកើតហេតុភ្លាមកម្លាំងសមត្ថកិច្ចមូលដ្ឋាន សហការជាមួយសមត្ថកិច្ចជំនាញចរាចរ បានចុះមកធ្វើការវាស់វែងនៅកន្លែងកើតហេតុ។ក្រោយពីកើតហេតុភាគីរថយន្តបង្កបានសុំសម្របសម្រួល ដោយព្រមសងសំណងទៅអោយម្ចាស់ផ្ទះចំនួន៩៥០ដុល្លារ និងភាគីម៉ូតូរងរបួសចំនួន២៥០ដុល្លារ ជាការបញ្ចប់រឿង៕