មន្ត្រីរាជការ គ្រូបង្រៀន ព្រមទាំងកងកម្លាំងទាំង៣ប្រភេទ នៅក្រុងបាត់ដំបង ទទួលការពិនិត្យភ្នែក និងផ្តល់វ៉ែនតា ពីក្រុមគ្រូពេទ្យភ្នែកកម្ពុជា ឥតគិតថ្លៃ
ខេត្តបាត់ដំបង៖ក្រុមគ្រូពេទ្យភ្នែកកម្ពុជា សហការជាមួយសហភាពសហព័ន្ធយុវជនកម្ពុជាខេត្តបាត់ដំបង បានចុះវាស់ភ្នែក និងចែកវ៉ែនតាសម្រាប់អានអក្សរ និងវ៉ែនតាការពារពន្លឺកុំព្យូទ័រ ដោយគិតឥតថ្លៃ ជូនមន្រ្តីរាជការ កងកម្លាំងទាំងបីប្រភេទប្រមាណជាង១២០០នាក់ នាព្រឹកថ្ងៃសៅរ៍ ៦កើត ខែកត្តិក ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០២ ខែវិច្ឆិកា ឆ្នាំ២០១៩ នៅសាលសន្និសីទសាលាខេត្តបាត់ដំបង ដោយមានការអញ្ជើញចូលរួមពីឯកឧត្តម អ៊ុយ រី ប្រធានក្រុមប្រឹក្សាខេត្តបាត់ដំបង។
ក្នុងនោះក៏មានការអញ្ជើញចូលរួមពី ឯកឧត្តម លោកជំទាវ សមាជិកក្រុមប្រឹក្សាខេត្ត តំណាង ស.ស.យ.ក ខេត្តបាត់ដំបង លោកចក្ខុបណ្ឌិត ប៉ាង សាម៉ន ប្រធានមន្ទីរពេទ្យភ្នែកគៀនឃ្លាំង ពេទ្យភ្នែកកម្ពុជា និងក្រុមការងារជាច្រើនរូបទៀត។
លោកចក្ខុបណ្ឌិត ប៉ាង សាម៉ន ក្នុងនាមក្រុមការងារពេទ្យភ្នែក ដោយកិច្ចសហការជាមួយដៃគូរជាច្រើនទៀត ក្រុមការងារលោកតែងបានចុះជួយពិនិត្យភ្នែក និងចែកវ៉ែនតាជូនមន្រ្តីរាជការ កងកម្លាំងទាំងបី និងប្រជាពលរដ្ឋរហូតមក។
លោកបញ្ជាក់ថា វ៉ែនតាដែលត្រូវយកមកចែកជូននេះ គឺបានពីការចូលរួមពីសប្បុរសជន ក្រុមគ្រូពេទ្យផ្សេងៗ ក្រុមជំនុំគ្រីស្ទាន និងដៃគូរផ្សេងទៀត បានចូលរួមបរិច្ចាក។
ឯកឧត្តម អ៊ុយ រី ក្នុងនាមរដ្ឋបាលខេត្ត និងក្រុមប្រឹក្សា ជួសមុខឲ្យមន្រ្តីរាជការខេត្តបាត់ដំបង សូមថ្លែងអំណរគុណ ដល់ក្រុមការងារក្រុមគ្រូពេទ្យភ្នែក សហការជាមួយ ស.ស.យ.ក ខេត្ត បានចុះមកជួយដល់អ្នកដែលមានបញ្ហាភ្នែក នៅក្នុងខេត្តរហូតមក។
ឆ្លៀតក្នុងឱកាសនោះ ឯកឧត្តម ក៏បានជម្រាបជូន អ្នកចូលរួមពីសភាពនយោបាយថ្មីៗនេះថា ក្រុមបក្ខពួកក្បត់ជាតិ ដែលមានទណ្ឌិត សម រង្សី ជាមេក្លោង បាននិងកំពុងផ្សព្វផ្សាយឃោសនាឲ្យអតីតសកម្មជនរបស់ខ្លួន ដើរគៀងគរប្រមូលផ្តុំក្នុងគោលបំណង ធ្វើសកម្មភាពរដ្ឋប្រហារ ផ្តួលរំលំរាជរដ្ឋាភិបាលស្របច្បាប់ ។
ឯកឧត្តម បានបន្តថា ដើម្បីជៀសវាងមានទោសទណ្ឌដល់ខ្លួនទាំងមន្រ្តីរាជការ កងកម្លាំងទាំងអស់ និងប្រជាពលរដ្ឋផងដែរ សូមកុំចាញ់បោកជឿឃោសនារបស់ក្រុមក្បត់ជាតិ កុំដើរធ្វើសកម្មភាពអ្វីដែលខុសច្បាប់ឲ្យសោះ ព្រោះបក្ខពួកក្រៅច្បាប់ទាំងនេះ គ្មានសិទ្ធធ្វើអ្វីខុសច្បាប់ទៀតឡើយ៕