ឯកឧត្ដម ម៉ែន វិបុល អញ្ជើញជាអធិបតីក្នុងកិច្ចប្រជុំ បូកសរុប លទ្ធផលការងារប្រចាំខែវិច្ឆិកា និងលើកទិសដៅការងារ ខែធ្នូ ឆ្នាំ២០១៩ របស់រដ្ឋបាលខេត្ត
ខេត្តស្វាយរៀង៖នាព្រឹកថ្ងៃចន្ទ ១៤រោច ខែកត្កិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៥ ខែវិច្ឆិកា ឆ្នាំ២០១៩នេះ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជើញជាអធិបតីក្នុងកិច្ចប្រជុំបូកសរុប លទ្ធផលការងារប្រចាំខែវិច្ឆិកា និងលើកទិសដៅការងារខែធ្នូ ឆ្នាំ២០១៩ របស់រដ្ឋបាលខេត្ត នៅសាលប្រជុំនន្ទី អគារ ខ សាលាខេត្ត។
កិច្ចប្រជុំនេះមានការអញ្ជើញចូលរួមពីសំណាក់ឯកឧត្ដមអភិបាលរងខេត្ត លោក លោកស្រី នាយក នាយករងរដ្ឋបាលសាលាខេត្ត លោកប្រធានសាលាដំបូងខេត្ត លោកព្រះរាជអាជ្ញារងសាលាដំបូងខេត្ត សាកលវិទ្យាធិការសាកលវិទ្យាល័យស្វាយរៀង លោកស្នងការនគរបាលខេត្ត លោកមេបញ្ជាការរងតំបន់ប្រតិបត្តិសឹករងស្វាយរៀង លោកមេបញ្ជាការរងកងរាជអាវុធហត្ថខេត្ត លោកអនុប្រធានពន្ធធនាគារខេត្ត លោក លោកស្រីប្រធានមន្ទីរ-អង្គភាពនានាជុំវិញខេត្ត លោកអភិបាលក្រុង ស្រុក លោក លោកស្រីនាយកទីចាត់ការ/ប្រធានអង្គភាពចំណុះសាលាខេត្ត ប្រធានច្រកទ្វារព្រំដែន និងមន្ត្រីពាក់ព័ន្ធជាច្រើនរូបផងដែរ។
មានប្រសាសន៍ក្នុងឱកាសនោះ ឯកឧត្ដមអភិបាលខេត្តបានផ្ដាំផ្ញើដល់ មន្ទីរ-អង្គភាព រដ្ឋបាលក្រុង ស្រុក កងកម្លាំងប្រដាប់អាវុធ និងអ្នកពាក់ព័ន្ធទាំងអស់ត្រូវបន្តយកចិត្តទុកដាក់អនុវត្តកិច្ចការសំខាន់ៗ មួយចំនួនដូចខាងក្រោម ៖
១.ត្រូវបន្តយកចិត្តទុកដាក់ថែរក្សាសន្តិសុខ សណ្តាប់ធ្នាប់សង្គម នៅក្នុងខេត្តឲ្យបានល្អប្រសើរ ។
២.ត្រូវផ្សព្វផ្សាយដល់អាជ្ញាធរមូលដ្ឋាន និងប្រជាពលរដ្ឋ ដើម្បីត្រៀមលក្ខណៈក្នុងការថែរក្សាទឹកទុកក្នុងកំឡុងពេលដែលភាពរាំងស្ងួត និងចូលមកដល់នារដូវប្រាំងខាងមុខនេះ។
៣- អាជ្ញាធរពាក់ព័ន្ធគ្រប់លំដាប់ថ្នាក់ត្រូវជម្រុញការដោះស្រាយទំនាស់នៅតាមមូលដ្ឋានរបស់ខ្លួន អោយបានទាន់ពេលវេលា ស្របតាមសំណូមពរ និងពាក្យបណ្តឹងរបស់បងប្អូនប្រជាពលរដ្ឋ។
៤.រដ្ឋបាលក្រុង-ស្រុក អង្គភាពពាក់ព័ន្ធត្រូវពង្រឹងការគ្រប់គ្រង ថែរក្សាការពារដីរដ្ឋឱ្យបានល្អ។
៥.ត្រូវពិនិត្យទប់ស្កាត់អោយបាននូវការសាង សង់សំណង់ ឫតូបលក់ដូរណាដែលរំលោភមកលើដីចំណីផ្លូវសាធារណៈអោយមានប្រសិទ្ធភាព។
៦.មន្ទីរកសិកម្ម រុក្ខាប្រមាញ់ និងនេសាទ ត្រូវពិនិត្យតាមដានការងារបង្ករបង្កើនផល និងការប្រមូលផលស្រូវរបស់ប្រជាពលរដ្ឋអោយបានទាន់ពេលវេលា។
ក្នុងនោះឯកឧត្ដមអភិបាលខេត្ត បានថ្លែងអំណរគុណ និងកោតសរសើរចំពោះ លោក លោកស្រីថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធក្នុងខេត្តស្វាយរៀងទាំងអស់ ដែលបានសហការអនុវត្តតួនាទី ភារកិច្ចរបស់ខ្លួន ក្នុងការផ្តល់សេវាសាធារណៈ ការដាក់វេនប្រចាំការ និងការចូលរួមសហការទប់ស្កាត់បដិវត្តពណ៌ ដែលដឹកនាំដោយជនក្បត់ជាតិ សម រង្ស៊ី ប៉ុនប៉ងផ្តួលរំលំរាជរដ្ឋាភិបាលស្របច្បាប់កាលពីថ្ងៃទី៩ ខែវិច្ឋិកា ឆ្នាំ២០១៩កន្លងទៅ ដែលធានាបាននូវ សន្ដិសុខ សុវត្ថិភាព ជូនដល់បងប្អូនប្រជាពលរដ្ឋបានល្អប្រសើ៕
