វេទិកាស្ដីពីការការពារ និងអភិរក្សធនធានធម្មជាតិក្រោមប្រធានបទ «ការប្ដេជ្ញាចិត្ត និងភាពម្ចាស់ការនៅមូលដ្ឋាន ដើម្បីធានាដល់និរន្តរភាពនៃការប្រើប្រាស់ធនធានធម្មជាតិ»
ខេត្តសៀមរាប៖ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន នាថ្ងៃចន្ទ ១៤រោច ខែកត្ដិក ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៥ ខែវិច្ឆិកា ឆ្នាំ២០១៩ បានអញ្ជើញជាអធិបតីក្នុងវេទិកា ការការពារ និងអភិរក្សធនធានធម្មជាតិ ក្រោមប្រធានបទ«ការប្ដេជ្ញាចិត្ត និងភាពម្ចាស់ការនៅមូលដ្ឋាន ដេីម្បីធានាដល់និរន្តរភាពនៃការប្រើប្រាស់ធនធានធម្មជាតិ»។
ក្នុងនោះក៏មានការអញ្ជើញចូលរួមពីលោក ង៉ាន់ ភិរុណ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប និងលោក លោកជំទាវ រដ្ឋលេខាធិការ អនុរដ្ឋលេខាធិការ អភិបាលរងខេត្ត (កំពង់ចាម កំពង់ធំ ព្រះវិហារ បន្ទាយមានជ័យ និងឧត្ដរមានជ័យ) លោក លោកស្រីប្រធាន អនុប្រធានមន្ទីរបរិស្ថាន ប្រធានសហគមន៍ និងអ្នកពាក់ព័ន្ធនានាសរុបចំនួន២២៨នាក់។
គោលបំណង នៃវេទិកានេះគឺ៖
១-ដើម្បីពិភាក្សាបញ្ហាប្រឈម និងតម្រូវវការនានា ដែលធ្វើអោយរាំងស្ទះ និងប៉ះពាល់ដល់ការប្តេជ្ញាចិត្ត និងភាពម្ចាស់ការក្នុងមូលដ្ឋានដែលរួមចំណែកដល់ការគ្រប់គ្រង និងប្រើប្រាស់ធនធានធម្មជាតិដោយនិរន្តរភាព។
២-ដើម្បីបង្កើនភាពជាម្ចាស់របស់សហគមន៍ទាំងមូលដ្ឋាន និងអ្នកពាក់ព័ន្ធនានានៅថ្នាក់ក្រោមជាតិ ក្នុងការងារអភិបាលកិច្ចធនធានធម្មជាតិ និងការទទួលខុសត្រូវ និងដើម្បីពង្រឹងកិច្ចសហការរវាងអ្នកពាក់ព័ន្ធទាំងអស់ក្នុងការការពារធនធានធម្មជាតិនៅក្នុងប្រទេសកម្ពុជា សម្រាប់អ្នកជំនាន់ក្រោយ។
លោកអភិបាលរងខេត្តបានមានមតិស្វាគមន៍ រាយការណ៍ពីតំបន់ការពារធនធានធម្មជាតិទាំង០៨កន្លែង និងបញ្ហាប្រឈមនានា ក្នុងការការពារធនធានធម្មជាតិទាំងនោះ តំបន់ការពារធនធានធម្មជាតិក្នុងខេត្តសៀមរាប រួមមាន៖
១-ឧទ្យានជាតិព្រះជ័យវរ្ម័ន-នរោត្តម ភ្នំគូលែន ២-តំបន់ការពារទេសភាពអង្គរ
៣-តំបន់ប្រើប្រាស់ច្រើនយ៉ាងបឹងទន្លេសាប
៤-ដែនជម្រកសត្វព្រៃគូលែន-ព្រហ្មទេព
៥-ដែនជម្រកសត្វព្រៃបឹងពែរ ៦-ដែនជម្រកសត្វព្រៃភ្នំត្នោត-ភ្នំពក ៧-តំបន់ការពារទេសភាព ទំនាបខាងជើងបឹងទន្លេសាប
៨-តំបន់ស្នូលបឹងទន្លេឆ្មារ(តំបន់រ៉ាមសារ)។
ឯកឧត្តមរដ្ឋមន្ត្រី បានមានប្រសាសន៍ថា ដើម្បីការពារ និងអភិរក្សធនធានធម្មជាតិរបស់យើងប្រកបដោយការប្ដេជ្ញារចិត្ត និងភាពម្ចាស់ការនៅមូលដ្ឋាន ដើម្បីធានាដល់និរន្តរភាពនៃការប្រើប្រាស់ធនធានធម្មជាតិ លុះត្រាតែប្រជាជន ប្រជាពលរដ្ឋនៅក្នុងសហគមន៍ទទួលបានអត្ថប្រយោជន៍ពីសហគមន៍ និងធ្វើឲ្យជីវភាពសហគមន៍ប្រសើរឡើង មានអាហាររូបត្ថម្ភ សន្តិសុខស្បៀង សុខមាលភាពរបស់ប្រជាជន មានការងារធ្វើ មានសាលារៀន សហគមន៍ត្រូវលុបបំបាត់ជម្ងឺគ្រុនចាញ់ ជម្ងឺអេដស៍ និងជម្ងឺឆ្លងនានា និងកែប្រែសហគមន៍ទៅជាតំបន់អេកូទេសចរណ៍ អភិវឌ្ឍន៍គោលនយោបាយអេកូទេសចរណ៍ និងបញ្ចូលសហគមន៍ជាបេតិកភណ្ឌជាតិ៕
