រដ្ឋបាលខេត្តស្វាយរៀង ប្រារព្ធពិធីទិវាអន្តរជាតិ រំលឹកដល់អ្នករងគ្រោះ ដោយគ្រោះថ្នាក់ចរាចរណ៍ ផ្លូវគោកលើកទី១៤
ខេត្តស្វាយរៀង៖លោកជំទាវ ឯក សុវណ្ណភារៈ អភិបាលរងខេត្ត តំណាង ឯកឧត្តម ម៉ែន វិបុល អភិបាល នៃគណ:អភិបាលខេត្តស្វាយរៀង និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្ត កាលពីព្រឹកថ្ងៃអាទិត្យ ១៣រោច ខែកត្តិក ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៤ ខែវិច្ឆិកា ឆ្នាំ២០១៩ បានអញ្ជើញជាអធិបតី ក្នុងទិវាអន្តរជាតិរំលឹកដល់អ្នករងគ្រោះដោយគ្រោះថ្នាក់ចរាចរណ៍ ផ្លូវគោកលើកទី១៤ នៅបរិវេណសាលាស្រុកស្វាយ។
ទិវានេះមានការអញ្ជើញចូលរួមពី លោកស្រីនាយករងរដ្ឋបាលខេត្ត លោកស្នងការរងនគរបាលខេត្ត លោកមេបញ្ជាការរងកងរាជអាវុធហត្ថខេត្ត លោក លោកស្រី ប្រធាន អនុប្រធានមន្ទីរនានាជុំវិញខេត្ត លោក លោកស្រី អភិបាល អភិបាលរង ក្រុង ស្រុកទាំង៨ និងលោកអធិការ អធិការរងនគរបាលក្រុង ស្រុកទាំង៨ លោក លោកស្រី ប្រធាន និងសមាជិក ក្រុមប្រឹក្សាស្រុកស្វាយជ្រំ លោកមេបញ្ជាការសឹករងស្រុក លោកមេបញ្ជាការកងរាជអាវុធហត្ថស្រុក លោក លោកស្រី មន្រ្តីរាជការមន្ទីរសាធារណការ និងដឹកជញ្ជូនខេត្ត មន្ត្រីរាជការរដ្ឋបាលស្រុកស្វាយជ្រំ លោកគ្រូ អ្នកគ្រូ ប្អូនៗសិស្សានុសិស្ស ប្អូនៗយុវជនស.ស.យ.កស្រុក និងប្រជាពលរដ្ឋស្រុកស្វាយជ្រំ សរុបចំនួន២៥០នាក់។
លោក នួន លីហួន ប្រធានមន្ទីរសាធារណការ និងដឹកជញ្ជូនខេត្ត បានធ្វើរបាយការណ៍ បញ្ជាក់អំពីគ្រោះថ្នាក់ចរាចរណ៍រយៈពេល៩ខែ ឆ្នាំ២០១៩ ប្រៀបធៀបនិងរយៈពេល៩ខែ ឆ្នាំ២០១៨ គឺថយចុះ ០៦លើក ស្មើ៥%។
លោកជំទាវ ឯក សុវណ្ណភារៈ អភិបាលរងខេត្តស្វាយរៀង បានថ្លែងការចាប់អារម្មណ៍ និងយកចិត្តទុកដាក់ជាសំខាន់ ទៅលើគ្រោះថ្នាក់ចរាចរណ៍ ដែលកើតឡើងក្នុងទឹកដីខេត្តស្វាយរៀង ដើម្បីបង្កើនស្មារតី ទប់ស្កាត់ឱ្យបាននូវគ្រោះថ្នាក់ចរាចរណ៍ ដែលបង្កឱ្យមានការបាត់បង់អាយុជីវិតមនុស្ស ទ្រព្យសម្បត្តិរដ្ឋ និងឯកជនយ៉ាងច្រើន។
លោកជំទាវបញ្ជាក់ថា:ការរៀបចំទិវានេះ ជាឆន្ទៈរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយ គតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើអោយសង្គមជាតិមាន សុខសន្តិភាពពេញលេញ មានការអភិវឌ្ឍលើគ្រប់វិស័យ ជាពិសេសមាន ផ្លូវ ស្ពាន តភ្ជាប់ជាក្រឡាចត្រង្គ ទៅគ្រប់ ទិស តំបន់ ក្នុងប្រទេស និងភ្ជាប់ជាមួយប្រទេសជិតខាង ធ្វើឱ្យជីវភាពរស់នៅ របស់ប្រជាពលរដ្ឋកម្ពុជា មានលក្ខណៈល្អប្រសើរ ជាបន្តបន្ទាប់ អាចមានលទ្ធភាពទិញនូវម៉ូតូ រថយន្ត ស្ទើរតែគ្រប់ក្រុមគ្រួសារ ដើម្បីធ្វើដំណើរទំនាក់ទំនងទេសចរណ៍ និងធ្វើពាណិជ្ជកម្មផ្លាស់ប្តូរ ផលិតផល នៅក្នុងផ្ទៃប្រទេស និងជាមួយប្រទេសជិតខាង យ៉ាងមមារញឹក ទន្ទឹមនឹងនេះ ហានិភ័យ នៃការកើតមានគ្រោះថ្នាក់ចរាចរណ៍ ក៏មានការកើនឡើងដែរ បើសិនមិនមានការក្រើនរំលឹក ឱ្យប្រជាពលរដ្ឋគោរពច្បាប់ចរាចរណ៍ និងប្រុងប្រយ័ត្នក្នុងពេលធ្វើដំណើរ តាមដងផ្លូវ។
សូមជម្រាបផងដែរថា កន្លងមកឯកឧត្តម ម៉ែន វិបុល អភិបាល នៃគណៈអភិបាលខេត្ត និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្តស្វាយរៀង បានយកចិត្តទុកដាក់បំផុត ចំពោះការងារសុវត្ថិភាពចរាចរណ៍ផ្លូវគោក និងបានណែនាំជាប្រចាំដោយរិះរកគ្រប់វិធី និងមធ្យោបាយ ដើម្បីទប់ស្កាត់ កាត់បន្ថយគ្រោះថ្នាក់ចរាចរណ៍។ជាពិសេស ការប្រារព្វទិវានេះ ជាការពញ្ញាក់ស្មារតី របស់រាជរដ្ឋាភិបាលកម្ពុជា ឱ្យលាន់ស្នូររំពងសព្វទិសទី រួមជាមួយនឹងការផ្សព្វផ្សាយច្បាប់ ស្តីពីចរាចរណ៍ផ្លូវគោកថ្មី ដើម្បីដាស់តឿនអ្នកប្រើប្រាស់ផ្លូវទាំងថ្មើរជើង ទាំងអ្នកបើកបរយានយន្តគ្រប់ប្រភេទឱ្យខិតខំផ្លាស់ប្តូរឥរិយាបថ ដែលមិនគោរពច្បាប់ មកប្រកាន់យកឥរិយាបថដែលគោរពច្បាប់ មានសណ្តាប់ធ្នាប់របៀបរៀបរយល្អ មានការអធ្យាស្រ័យ និងគោរពច្បាប់ចរាចរណ៍នៅពេលធ្វើដំណើរ៕