ប្រហិតចម្រុះ១០គីឡូក្រាម និងចាហួយក្មេងចំនួន៣គីឡូក្រាម ដាក់តាំងលក់ស្តង់តាំងពិព័រណ៍ខូចគុណភាព ត្រូវបានកាំកុងត្រូល ខេត្តស្ទឹងត្រែង ចាប់យកទៅដុតកម្ទេចចោល
ខេត្តស្ទឹងត្រែង៖ប្រហិតចម្រុះខូចគុណភាពចំនួន១០គីឡូក្រាម និងចាហួយក្មេងខូចគុណភាពចំនួន ៣គីឡូក្រាម ដែលអាជីវករដាក់តាំងលក់នៅស្តង់តាំងពិព័រណ៍ក្នុងឱកាសបុណ្យអ៊ុំទូក ត្រូវបានមន្រ្តីសាខាកាំកុងត្រូលខេត្តស្ទឹងត្រែង ដឹកនាំដោយលោក គឹម ប្រុស ប្រធានសាខាខេត្ត សហការជាមួយមន្ទីរពាណិជ្ជកម្ម និងអាជ្ញាធររដ្ឋបាលក្រុងស្ទឹងត្រែង ចុះត្រួតពិនិត្យ និងដកហូតយកទៅដុតកម្ទេចចោល កាលពីព្រឹកថ្ងៃទី០១ ខែវិច្ឆិកា ឆ្នាំ២០១៩ ស្ថិតនៅក្រុងស្ទឹងត្រែង បន្ទាប់ពីរកឃើញថាខូចគុណភាព។
ពាក់ពន្ឋ័ករណីខាងលើនេះដែរបើតាមលោក គឹម ប្រុស បានឱ្យដឹងថា ក្នុងប្រតិបត្តិការចុះពិនិត្យទំនិញ តាមស្តង់តាំងពិព័រណ៍នេះក្រុមការងារបានរកឃើញប្រហិតចំរុះ ខូចគុណភាពចំនួន១០គីឡូក្រាម និងចាហួយក្មេងខូចគុណភាពចំនួន៣គីឡូក្រាម ក្រោយមកក្រុមការងារ បានធ្វើកំណត់ហេតុដកហូតយកទៅដុតកម្ទេចចោលភ្លាមៗតែម្តង។
ជាមួយគ្នានោះដែរមន្រ្តីកាំកុងត្រូលបានអំពាវនាវដល់អាជីវករទាំងអស់ ត្រូវមានការប្រុងប្រយ័ត្ន និងយកចិត្តទុកដាក់ឱ្យបានម៉តចត់ មុននឹងធ្វើចរាចរណ៍ ចែកចាយលក់ដូរ ទិញទំនិញ និងម្ហូបអាហារទទួលទានដោយសុវត្ថិភាព ត្រូវប្រុងប្រយ័ត្ន ដើម្បីជៀសវាងការប៉ះពាល់ដល់សុខភាពអ្នកប្រើប្រាស់ ពិសេសចំណីអាហារ៕