អភិបាលខេត្តបន្ទាយមានជ័យ ស្នើឲ្យមន្ទីពេទ្យពង្រឹងគុណភាព ប្រសិទ្ធភាពសេវាសុខាភិបាល ដើម្បីជួយលើកកម្ពស់សុខភាពពលរដ្ឋ ស្ត្រីនិងកុមារ ជាការរួមចំណែកកាត់បន្ថយភាពក្រីក្រ
ខេត្តបន្ទាយមានជ័យ៖ដើម្បីកាត់បន្ថយភាពក្រីក្រ មន្ត្រីសុខាភិបាល គ្រូពេទ្យ និងពិសេសលោកប្រធានថ្មី នៃមន្ទីរពេទ្យក្រុងប៉ោយប៉ែត ដែលបម្រើការក្នុងវិជ្ជាជីវៈពេទ្យនេះ ត្រូវបង្កើនការយកចិត្តទុកដាក់ដល់ការផ្តល់សេវាសុខភាព ដើម្បីលើកកម្ពស់សុខុមាលភាពប្រជាពលរដ្ឋ ស្ត្រី និងកុមារ ពិសេសគឺពលរដ្ឋក្រីក្រ ស្ត្រីមានផ្ទៃពោះ ស្ត្រីសម្រាលកូន ស្ត្រីក្រីក្រ និងកុមារីព្រោះពួកគេជាសមាជិកគ្រួសារដែលមានសុខភាពទន់ខ្សោយ ហើយងាយរងគ្រោះ។
ឯកឧត្ដម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យមានប្រសាសន៍បែបនេះក្នុងឱកាសដែលឯកឧត្តមអញ្ជើញជាអធិបតីក្នុងពិធីប្រកាសចូលកាន់មុខតំណែងប្រធានមន្ទីរពេទ្យបង្អែកក្រុងប៉ោយប៉ែត ដោយលោកវេជ្ជបណ្ឌិត ឱក ទីណា ពីអនុប្រធាន ឡើងជាប្រធានមន្ទីរពេទ្យបង្អែកក្រុងប៉ោយប៉ែត ជំនួសលោកវេជ្ជបណ្ឌិត ហ៊ុល ផល្លី ដែលផ្ទេរទៅជាប្រធានការិយាល័យសុខាភិបាលប្រតិបត្តិក្រុងសិរីសោភ័ណ។
សូមជំរាបដែរថា ក្នុងពិធីនោះផងដែរក៏មានការអញ្ជើញចូលរួមពី លោកអនុប្រធានមន្ទីរសុខាភិបាលខេត្ត លោកអភិបាលក្រុងប៉ោយប៉ែត លោក លោកស្រី សមាជិកក្រុមប្រឹក្សាក្រុង កងកម្លាំងនានាជុំវិញស្រុក លោកគ្រូ អ្នកគ្រូពេទ្យ ព្រមទាំងសមាជិក សមាជិកានៃអង្គពិធីជាច្រើនរូបទៀត ដែរប្រព្រឹត្តទៅកាលពីរសៀលថ្ងៃព្រហស្បត្តិ៍ ១០រោច ខែកត្តិក ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២១ ខែវិច្ឆិកា ឆ្នាំ២០១៩ ក្នុងបរិវេណមន្ទីពេទ្យបង្អែក្រុងប៉ោយប៉ែត ខេត្តបន្ទាយមានជ័យ។
លោក គាត ហ៊ុល អភិបាលក្រុងប៉ោយប៉ែតបានមានប្រសាសន៍ថា ក្រុងមានផ្ទៃដីតូចមែន តែមានពលរដ្ឋរស់នៅកើនដល់ជាង៨ម៉ឺននាក់ ក្នុងនោះមានមណ្ឌលសុខភាពចំនួន៤កន្លែង និងមន្ទីរពេទ្យបង្អែក១កន្លែងសម្រាប់បម្រើសេវាសុខភាពជូនប្រជាពលរដ្ឋ។
ទន្ទឹមនោះដែរលោកវេជ្ជបណ្ឌិត ឱក ទីណា ឡើងកាន់តំណែងជាប្រធានមន្ទីពេទ្យថ្មីនោះ បានឡើងប្តេជ្ញាចិត្តនឹងខិតខំប្រឹងប្រែងបំពេញតួនាទី ភារកិច្ចក្នុងសីលធម៍វិជ្ជាវីវៈរកបដោយការទទួលខុសត្រូវអោយបានលទ្ធផលល្អនិងមានប្រសីទ្ធភាពថែមទៀត។
ជាមួយគ្នានោះដែរលោកវេជ្ជបណ្ឌិត ហេង គឹមស៊ត ប្រធានស្តីទីមន្ទីរសុខាភិបាលខេត្តបន្ទាយមានជ័យបានមានប្រសាសន៍ថា៖មន្ត្រីសុខាភិបាល វេជ្ជបណ្ឌិត គ្រូពេទ្យគិលានុបដ្ឋាក -យិកាទាំងឡាយក្នុងខេត្ត និងក្នុងក្រុងប៉ោយប៉ែត ពិសេសមន្ទីរពេទ្យបង្អែកក្រុងនេះតែម្តង ត្រូវបន្តខិតខំប្រឹងប្រែងប្រកបវិជ្ជាជីវៈដោយឆន្ទៈទទួលខុសត្រូវខ្ពស់ក្នុងការបំពេញភារកិច្ចសំរេចបានលទ្ធផល និងជោគជ័យបន្តទៀត លើការផ្តល់សេវារដ្ឋបាល និងសេវាសុខភាព ដើម្បីសុខុមាលភាពប្រជាពលរដ្ឋ។
ឯកឩត្តម អ៊ុំ រាត្រី អភិបាលខេត្តគូសបញ្ជាក់ផងដែរថា រដ្ឋបាលខេត្តអបអរនិងកោតសរសើរចំពោះមន្ទីរពេទ្យ ដែលមានមគ្រូពេទ្យ មានអគារ មានគ្រែពេទ្យច្រើនជាងគេបើធៀបនឹងក្រុង ស្រុកដទៃ ហើយមានអ្នកជម្ងឺមកពិនិត្យ ព្យបាលពេញៗ នេះសបញ្ជាក់ឲ្យឃើញថា ពលរដ្ឋយើងមានជំនឿឡើងវិញលើសេវាសុខភាព នៃមន្ទីរពេទ្យរដ្ឋ ហើយក៏កាត់បន្ថយការទៅពិនិត្យ ព្យាបាលនៅឯប្រទេសថៃផងដែរ៕