កិច្ចប្រជុំប្រតិភូក្រុមការងារ SMCC មជ្ឈមណ្ឌលសម្របសម្រួលសុវត្ថិភាព ទន្លេមេគង្គ៦ប្រទេស ដើម្បីពង្រឹង ពង្រីកកិច្ចសហប្រតិបត្តិការផ្លាស់ប្តូរពត៌មាន ពាក់ពន្ធ័នឹងការបង្ក្រាប បទល្មើសគ្រឿងញៀន
ខេត្តព្រះសីហនុ៖នាព្រឹកថ្ងៃព្រហស្បត្តិ៍ ១០រោជ ខែកក្តិក ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២១ ខែវិច្ឆិកា ឆ្នាំ២០១៩ ប្រតិភូក្រុមការងារ SMCC (មជ្ឈមណ្ឌលសម្របសម្រួលសុវត្ថិភាពទន្លេមេគង្គ) ៦ប្រទេស ដើម្បីពង្រឹង ពង្រីកកិច្ចសហប្រតិបត្តិការផ្លាស់ប្តូរពត៌មានពាក់ពន្ធ័នឹងការបង្ក្រាបបទល្មើសគ្រឿងញៀន មកឈ្វេងយល់ពីសកម្មភាពគ្រឿងញៀននៅខេត្តព្រះសីហនុ ដឹកនាំដោយឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការរង អ.ជ.ប.គ.ញ និងជាប្រធានគណ:ប្រតិភូ និងឯកឧត្តម គួច ចំរើន អភិបាល នៃគណ:អភិបាលខេត្តព្រះសីហនុ។
ឯកឧត្តម គួច ចំរើន អភិបាល នៃគណ:អភិបាលខេត្តព្រះសីហនុ បានមានប្រសាសន៍ស្វាគមន៍ប្រតិភូ និងជម្រាបជូនពីភូមិសាស្ត្រ និងសក្តានុពលរបស់ខេត្តព្រះសីហនុ ជាខេត្តតំបន់ឆ្នេរ មានព្រលានយន្តហោះអន្តរជាតិ កំពង់ផែទឹកជ្រៅ ផ្លូវដែក និងផ្លូវគោក ដែលរាជរដ្ឋាភិបាលបានកំណត់ខេត្តព្រះសីហនុ ជាតំបន់សេដ្ឋកិច្ចគំរូពហុបំណង ។ ម្យ៉ាងទៀតដោយកម្ពុជាមានសុខសន្តិភាព សម្តេចបានគៀងគរអ្នកវិនិយោគមកកាន់កម្ពុជា ពិសេសមកកាន់ខេត្តព្រះសីហនុ ធ្វើឱ្យខេត្តព្រះសីហនុមានការរីកចម្រើន។
ខេត្តមានតំបន់សេដ្ឋកិច្ចពិសេសចំនួន៥ មានវិនិយោគជាង ២០០ក្រុមហ៊ុន ស្រូបយកកម្លាំងពលកម្មជាង ៨ម៉ឺននាក់ មានកាស៊ីណូជាង៧០ ស្រូបយកកម្លាំងពលកម្មជាង ៣ម៉ឺននាក់ ។
ឯកឧត្តមបានបន្តថា ខេត្តមានការរីកចម្រើនលើអចលន:ទ្រព្យ មានសំណង់អគារខ្ពស់ជាច្រើន ដែលអាចបញ្ជាក់ថា ជាខេត្តរីកលូតលាស់ផ្នែកសំណង់ ទន្ទឹមនោះវាក៍មានផលប៉ះពាល់មួយចំនួន ផ្នែកសន្តិសុខ និងហេដ្ឋារចនា សម្ព័ន្ធ ដែលពីមុនខេត្តព្រះសីហនុ ជាខេត្តទេសចរណ៍ បច្ចុប្បន្នក្លាយជាតំបន់សេដ្ឋកិច្ចគំរូពហុបំណង ធ្វើឱ្យមានការខូចខាតផ្លូវថ្នល់ជាច្រើន ក្នុងនោះរាជរដ្ឋាភិបាលកម្ពុជា បានទំលាក់កញ្ចប់ថវិកាក្នុងការស្ថាបនាផ្លូវ ៣៤ខ្សែក្នុងក្រុងព្រះសីហនុ ដែលបានបើកសម្ពោធបើកការដ្ឋានកាលពីថ្ងៃទី១៦ ខែវិច្ឆិកាឆ្នាំ២០១៩កន្លងមកនេះ ក្រោមអធិបតីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីធានាការដឹកជញ្ជូន និងសោភណ័ភាព។
ដោយសារកំណើន នៃលំហូរចូលប្រជាពលរដ្ឋ អ្នកវិនិយោគ និងភ្ញៀវទេសចរណ៍បានជំរុញសេដ្ឋកិច្ចខេត្តព្រះសីហនុមានការរីកចម្រើន ក៏ប៉ុន្តែវាក៏មានផលប៉ះពាល់ខ្លះ ដែលយើងត្រូវការស្វែងយល់ពីវប្បធម៌ ប្រពៃណី និងចូលរួមអនុវត្តច្បាប់កម្ពុជា។ចំពោះបញ្ហាគ្រឿងញៀននៅខេត្តព្រះសីហនុ មានបញ្ហាប្រឈមខ្លះ ដោយសារតែប្រជាពលរដ្ឋចំណាកស្រុក និងអ្នកវិនិយោគ ទេសចរណ៍មកធ្វើការងារនៅខេត្តព្រះសីហនុ និងតាមការអូសទាញរបស់មិត្តភក្កិធ្លាក់ខ្លួនក្នុងការប្រព្រឹត្ត ប្រើប្រាស់ ចែកចាយគ្រឿងញៀន។អាជ្ញាធរខេត្ត ក៏បានធ្វើការអប់រំ ផ្សព្វផ្សាយអំពីបញ្ហាគ្រឿងញៀនដល់យុវជនដែលធ្វើចំណាកស្រុក ដើម្បីចូលរួមកាត់បន្ថយការប្រើប្រាស់ ការចែកចាយគ្រឿងញៀនកាន់តែមានប្រសិទ្ធិភាពថែមទៀត៕