ម៉ូតូ២គ្រឿង បុកគ្នាពេញទំហឹង បណ្ដាលឲ្យរងរបួសទាំងសងខាង ក្នុងសង្កាត់វត្តភ្នំ ខណ្ឌដូនពេញ
រាជធានីភ្នំពេញ៖កាលពីវេលា១១និង២០នាទី ថ្ងៃទី១៩ ខែវិច្ឆិកា ឆ្នាំ២០១៩ មានករណីគ្រោះថ្នាក់ចរាចរណ៍មួយបានកើតឡើងរវាង ម៉ូតូនិងម៉ូតូ បុកគ្នាពេញទំហឹង បណ្តាលឲ្យរងរបួសធ្ងន់ស្រាលទាំងសងខាង បញ្ជូនទៅមន្ទីពេទ្យភ្លាមៗ ចំណែកម៉ូតូទាំងពីរងការខូចខាតយ៉ាងដំណំ។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅតាមបណ្ដោយផ្លូវព្រះស៊ីសុវត្ថិកែងនឹងផ្លូវលេខ៩០ ស្ថិតនៅក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុមានម៉ូតូម៉ាកស្កុបពីពណ៌ស ពាក់ស្លាកលេខ1CL 6385 ដែលធ្វើដំណើរពីរនាក់ប្ដីប្រពន្ធក្នុងទិសដៅពីត្បូងទៅជើង លុះមកដល់ត្រង់ចំណុចកើតហេតុមានម៉ូតូម៉ាកសងសេ១២៥ មួយគ្រឿងពាក់ស្លាកលេខភ្នំពេញ1BA 6989បើកបរដោយបុរសម្នាក់បញ្ជាសទិសគ្នាបានបុកពេញទំហឹង បណ្តាលឲ្យភាគីខាងម៉ូតូស្កុបពី រងរបួសធ្ងន់បាក់ដៃម្ខាង(ប្តី) នឹងប្រពន្ធរងរបួសស្រាល។រីឯម្ខាងទៀតរងរបួសធ្ងន់ត្រូវបានបញ្ជូនទៅមន្ទីពេទ្យភ្លាមៗទាំងបីនាក់ ចំនែកម៉ូតូរងខូចខាតយ៉ាងដំណំទាំងសងខាង។
ក្រោយកើតហេតុសមត្ថកិច្ចមូលដ្ឋានបានមកដល់ទាក់ទងទៅសមត្ថកិច្ចជំនាញ ធ្វើការវាស់វែងយកម៉ូតូទាំងពីរទៅរក្សាទុកនៅសាលាខណ្ឌដូនពេញ រង់ចាំដោះស្រាយគ្នានៅពេលក្រោយ៕
