ឥទ្ធិពលគ្រឿងញៀន បានធ្វើឲ្យយុវជនម្នាក់ប្រើហឹង្សាក្នុងគ្រួសារ ត្រូវម្ដាយប្ដឹងអាវុធហត្ថចាប់ឃាត់ខ្លួន
ខេត្តបន្ទាយមានជ័យ៖កម្លាំងអន្តរាគមន៍កងរាជអាវុធហត្ថខេត្ត សហការជាមួយកម្លាំងការិយាល័យប្រឆាំងការជួញដូរមនុស្ស ដឹកនាំដោយលោកវរសេនីយ៍ត្រី ធឿង វាសនា នាយការិយាល័យប្រឆាំងការជួញដូរមនុស្ស កាលពីថ្ងៃទី១៨ ខែវិចិ្ឆកា ឆ្នាំ២០១៩ វេលាម៉ោង១៥ និង ០០នាទី បានចុះប្រតិបត្តិការបង្រ្កាបករណី ហឹង្សាក្នុងគ្រួសារ និងប្រើប្រាស់សារធាតុញៀនដោយខុសច្បាប់ដោយឃាត់ខ្លួនជនសង្ស័យបានចំនួន០១នាក់ នៅចំណុចភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
លោកវរសេនីយ៍ត្រី ធឿង វាសនា បានឲ្យដឹងថា៖យោងពាក្យបណ្តឹងរបស់ភាគីជនរងគ្រោះឈ្មោះ ពេជ្រ ម៉ាលេវី ភេទស្រី អាយុ៤៩ឆ្នាំ ជនជាតិខ្មែរ ត្រូវជាម្តាយរបស់ជនសង្ស័យ បច្ចុប្បន្នស្នាក់នៅក្នុងភូមិ/សង្កាត់ កើតហេតុខាងលើ បានបញ្ជាក់ថា៖ជនសង្ស័យឈ្មោះ លី ចាន់យីន ភេទប្រុស អាយុ២៥ឆ្នាំ ត្រូវជាកូនបង្កើតរបស់ខ្លួន និងជាមនុស្សញៀនថ្នាំ តែងអុកឡុករំខានអ្នកផ្ទះ រករឿងជេរប្រមាថម្តាយ និងជាក់ស្តែងនៅថ្ងៃកើតហេតុ ជនសង្ស័យបានរករឿងប្អូនស្រី និងរូបគាត់ជាម្តាយ ហើយថែមទាំងយកកាំបិតដេញចាក់ប្អូនស្រីទៀតផង។
ក្រោយទទួលបានពាក្យបណ្តឹង កម្លាំងអន្តរាគមន៍កងរាជអាវុធហត្ថខេត្ត សហការជាមួយកម្លាំងជំនាញបានចុះធ្វើការឃាត់ខ្លួនជនសង្ស័យ ដើម្បីយកមកសាកសួរ។ក្រោយពីបញ្ចប់ការស៊ើបអង្កេត តាមការបំភ្លឺរបស់ជនរងគ្រោះ និងតាមចម្លើយសារភាពរបស់ជនសង្ស័យ ឃើញមានភាពស៊ីសង្វាក់គ្នា បង្ហាញពីតម្រុយ នៃបទល្មើសយ៉ាងជាក់លាក់ ដូច្នេះជនសង្ស័យត្រូវបានចោទប្រកាន់ពីបទ ហិង្សាក្នុងគ្រួសារ និងប្រើប្រាស់នូវសារធាតុញៀនដោយខុសច្បាប់។
បច្ចុប្បន្នជនសង្ស័យ ត្រូវបានកម្លាំងជំនាញការិយាល័យប្រឆាំងការជួញដូរមនុស្សកងរាជអាវុធហត្ថខេត្ត កសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធី៕