សិក្ខាសាលាផ្សព្វផ្សាយគោលនយោបាយ និងឯកសារគតិយុត្តពាក់ព័ន្ធការគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ប្រកបដោយចីរភាព
ខេត្តកំពត៖នៅសណ្ឋាគារកំពតឌីយ៉ាម៉ងខេត្តកំពតកាលពីព្រឹកថ្ងៃទី១៨ ខែវិច្ឆិកា ឆ្នាំ ២០១៩ អគ្គលេខាធិការដ្ឋាននៃគណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជា បានបើកអង្គសិក្ខាសាលាមួយស្ដីពីការផ្សព្វផ្សាយគោលនយោបាយនិងឯកសារគតិយុត្តពាក់ព័ន្ធការគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជាប្រកបដោយចីរភាព។
សិក្ខាសាលានេះមានរយៈពេលមួយព្រឹកនិងមានសមាជិកចូលរួម ពីថ្នាក់ដឹកនាំនៃអាជ្ញាធរក្រុងស្រុកឃុំសង្កាត់ មន្ទីរអង្គភាពជុំវិញខេត្តនិងអាជីវករសរុបប្រមាណ ១២០ នាក់ ក្រោមអធិបតីភាព លោក ហង្សសុត សំភារ អនុរដ្ឋលេខាធិការក្រសួងរៀបចំដែនដីនគរូបនីយកម្មនិងសំណង់និងជាអគ្គលេខាធិការរងនៃគណៈកម្មាធិការគ្រប់គ្រងអភិវឌ្ឍតំបន់ឆ្នេរសមុទ្រកម្ពុជា តំណាងឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគររូបនីយកម្មនិងសំណង់ និង លោក នៃ គង់ អភិបាលរងខេត្តតំណាងឯកឧត្តម ជាវ តាយអភិបាល នៃគណៈអភិបាលខេត្ត។
លោកនៃ គង់ អភិបាលរងខេត្តបានចាត់ទុកអង្គសិក្ខាសាលាពេលនេះពិតជាមានសារៈសំខាន់ ពិសេសឱ្យដល់អាជ្ញាធរមូលដ្ឋានគ្រប់លំដាប់ថ្នាក់ បងប្អូនប្រជាពលរដ្ឋនិងអាជីវករដែលប្រកបមុខរបររកស៊ីអភិវឌ្ឍដីនិងសំណង់នៅខេត្តកំពត បានកាន់តែយល់ដឹងស៊ីជម្រៅអំពីលិខិតបទដ្ឋានគតិយុត្ត យន្តការ ការងារនីតិវិធីនិងសំណុំបែបបទស្នើសុំលិខិតអនុញ្ញាតអភិវឌ្ឍដី លិខិតអនុញ្ញាតសាងសង់ ការប្ដូរប្រភេទដីការកែសម្រួលក្បាលដីនឹងការស្នើសុំធ្វើប័ណ្ណសម្គាល់សិទ្ធិកាន់កាប់អចលនវត្ថុ។
មានប្រសាសន៍បើកអង្គសិក្ខាសាលា លោក ហង្សសុត សំភារ អនុរដ្ឋលេខាធិការក្រសួង រៀបចំដែនដីនគរូបនីយកម្មនិងសំណង់បានបញ្ជាក់ថា ការងាររៀបចំដែនដីនគរូបនីយកម្ម និងសំណង់គឺមិនត្រឹមតែរួមចំណែក យ៉ាងសំខាន់ ក្នុងការធានាអភិវឌ្ឍន៍និងការអភិរក្សប្រកបដោយចីរភាព តុល្យភាពនិងសមធម៌ប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ចកម្ពុជាតាមរយៈកំណើននៃការអភិវឌ្ឍ និងការសាងសង់ជារៀងរាល់ឆ្នាំជាកាតជាក់ស្ដែងក្នុង១ទសវត្សរ៍ចុងក្រោយនេះកំណើនសេដ្ឋកិច្ចកម្ពុជារក្សាបានស្ថេរភាពប្រមាណ៧% ក្នុងមួយឆ្នាំ ចំណូលមធ្យមសម្រាប់មនុស្សម្នាក់កើនឡើងពី ១៥៤៨ល្លារក្នុងឆ្នាំ ២០១៨ និងប៉ាន់ស្មានឡើងដល់១៦៧៩ ដុល្លារក្នុងឆ្នាំ២០១៩និងអត្រាភាពក្រីក្រក្រោម១០% នឹងបន្តថយចុះក្នុងអត្រា ១ភាគរយប្រចាំឆ្នាំ។
លោកហង្សសុត សំភារ ក៏បានឱ្យដឹងទៀតថាការអនុវត្តគោលនយោបាយជាតិស្ដីពីការរៀបចំដែនដី នៃព្រះរាជាណាចក្រកម្ពុជាគឺយើងផ្អែកលើយុទ្ធសាស្ត្រចតុកោណនិងកម្មវិធីនយោបាយរបស់រាជរដ្ឋាភិបាល ដោយរាជរដ្ឋាភិបាលបានសិក្សានិងកំណត់ច្បាស់លាស់អំពីយន្តការនីតិវិធី បទប្បញ្ញត្តិ និងផែនការអភិវឌ្ឍន៍ប្រទាក់ក្រឡាគ្នាសំដៅធានាថាដែនដីនៅទូទាំង ព្រះរាជាណាចក្រកម្ពុជា ត្រូវបានគ្រប់គ្រងប្រើប្រាស់ការពារនិងអភិវឌ្ឍន៍ប្រកបដោយប្រសិទ្ធភាព ចីរភាព សមធម៌និងសមាហរណកម្ម ដើម្បីគាំទ្រដល់ការអភិវឌ្ឍសេដ្ឋកិច្ចសង្គម ការធានាសន្តិសុខស្បៀង កិច្ចការពារជាតិ និងលំនឹងធម្មជាតិ។
លោកអនុរដ្ឋលេខាធិការក៏បានឱ្យដឹងនូវខ្លឹមសារនៃអង្គសិក្ខាសាលាពេលនេះគឺក្នុងគោលបំណង ដើម្បីផ្សព្វផ្សាយ ពីគោលការណ៍ណែនាំ អភិវឌ្ឍន៍ តំបន់ឆ្នេរសមុទ្រនៃព្រះរាជាណាចក្រកម្ពុជា គោលការណ៍ណែនាំអភិវឌ្ឍន៍រមណីយដ្ឋានឆ្នេរសមុទ្រ និងការគ្រប់គ្រងឆ្នេរខ្សាច់កម្សាន្ត ការអភិរក្សជីវៈចម្រុះសមុទ្រ និងតំបន់ឆ្នេរសមុទ្រ តាមរយៈការបង្កើតឧទ្យានជាតិសមុទ្រ និងការគ្រប់គ្រងសំណល់រឹង-រាវនៅតំបន់ឆ្នេរសមុទ្រសម្រាប់ការគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជាប្រកបដោយចីរភាព ជូនដល់អាជ្ញាធរខេត្ត មន្ទីរ អង្គភាពជំនាញពាក់ព័ន្ធ អាជ្ញាធរក្រុងស្រុក ឃុំ សង្កាត់ភូមិ និងផ្នែកឯកជននៃខេត្តកំពត៕
