សាខាកាកបាទក្រហមកម្ពុជា ខេត្តស្វាយរៀង ទទួលអំណោយមនុស្សធម៌ ពីព្រះវិសុទ្ធិញ្ញាណ មុំ សយ និងព្រះមន្ត្រីសង្ឃទាំង៨ ក្រុង ស្រុក
ខេត្តស្វាយរៀង៖ឯកឧត្តម ម៉ែន វិបុល អភិបាល នៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តស្វាយរៀង ព្រមទាំងសមាជិក សមាជិកា នៃគណៈកម្មាធិការសាខា នាព្រឹកថ្ងៃសុក្រ ៥កើត ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០១ ខែវិច្ឆិកា ឆ្នាំ២០១៩ នេះ បានទទួលអំណោយមនុស្សធម៌ ពីព្រះវិសុទ្ធិញ្ញាណ មុំ សយ ព្រះរាជាគណៈថ្នាក់កិត្តិយស និងជាព្រះមេគណខេត្ត ព្រមទាំងព្រះមន្ត្រីសង្ឃខេត្ត និងព្រះមន្ត្រីសង្ឃទាំង ៨ ក្រុង ស្រុក។
ក្នុងឱកាសនោះ ឯកឧត្តម ម៉ែន វិបុល ប្រធានគណៈកម្មាធិការសាខា បានថ្លែងអំណរព្រះគុណដ៏ជ្រាលជ្រៅបំផុតចំពោះទឹកព្រះទ័យដ៏ថ្លៃថ្លារបស់ព្រះសង្ឃគ្រប់អង្គ ដែលនេះជាការលើកទឹកចិត្តយ៉ាងធំធេងចំពោះកាកបាទក្រហមកម្ពុជា សម្រាប់ការនាំយកអំណោយទាំងនេះ ទៅចាត់ចែងប្រគល់ជូនប្រជាពលរដ្ឋងាយរងគ្រោះបំផុត កំពុងជួបការលំបាក និងត្រូវការជំនួយជាចាំបាច់។
បើយោងតាមរបាយការណ៍ពីអនុសាខាក្រុង ស្រុកទាំង៨ ឃើញថា ព្រះអនុគណ និងមន្ត្រីសង្ឃនៅតាមវត្តក្នុងក្រុង ស្រុក នីមួយៗតែងតែបានយកទេយ្យទានជាស្បៀង សម្ភារ និងថវិកា យកទៅប្រគល់ជូនដល់អនុសាខា ដើម្បីដោះស្រាយឆ្លើយតបដល់ប្រជាពលរដ្ឋនៅតាមសហគមន៍បាន ទទួលលទ្ធផលល្អប្រសើរក្នុងចលនាកាកបាទក្រហម ។
ជាមួយគ្នានេះ ឯកឧត្តមប្រធានគណៈកម្មាធិការសាខា ព្រមទាំងថ្នាក់ដឹកនាំ និងសហការីនៃសាខាកាកបាទក្រហមកម្ពុជាខេត្តស្វាយរៀង សូមបួងសួងប្រគេនថ្វាយព្រះពរ ព្រះសង្ឃគ្រប់ព្រះអង្គ សូមមានព្រះសុខភាពល្អ ព្រះជន្មាយុយឺនយូរ ដើម្បីបន្តទ្រទ្រង់វិស័យព្រះពុទ្ធសាសនាឱ្យបានគង់វង្ស រីកចម្រើនតរៀងទៅ។
អំណោយមនុស្សធម៌ដែលសាខាកាកបាទក្រហមកម្ពុជា ខេត្តស្វាយរៀង ទទួលបានរួមមាន៖អង្ករចំនួន១.១០០ គ.ក្រ,មី៤១ កេស,ទឹកស៊ីអ៊ីវ១១យួរ កន្លះ,ទឹកត្រី៥យួរ,បាឡុង៤ និងថវិកា ចំនួន៤.០០០.០០០រៀល ដល់សាខាសម្រាប់ត្រៀមបម្រុងឆ្លើយតបនៅពេលមានគ្រោះមហន្តរាយកើតឡើង៕