ឃាត់ខ្លួនជនសង្ស័យចំនួន០២នាក់ ពាក់ព័ន្ធទៅនឹងករណីគ្រឿងញៀន
ខេត្តក្រចេះ៖ដោយអនុវត្តតាមបទបញ្ជា លោក ឧត្តមសេនីយ៍ត្រី សាន្ត ប៊ុនថាន មេបញ្ជាការ កងរាជអាវុធហត្ថខេត្តក្រចេះ នៅវេលាម៉ោង១៤:៣០នាទី ថ្ងៃទី៣១ ខែតុលា ឆ្នាំ២០១៩ កម្លាំងមូលដ្ឋាន កងរាជអាវុធហត្ថក្រុងក្រចេះ ដឹកនាំដោយលោកវរសេនីយ៍ត្រី ផាត សុភក្រ្ត័វាសនា មេបញ្ជាការ ដោយមានការសម្របសម្រួលពីលោក កែវ សុជាតិ ព្រះរាជអាជ្ញាអមសាលាដំបូងខេត្តក្រចេះ កម្លាំងបានឃាត់ខ្លួនជនសង្ស័យបានចំនួន០២នាក់ ពាក់ពន្ឋ័ករណីជួញដូរ ឬប្រើសប្រាស់ដោយខុសច្បាប់នូវសារធាតុញៀន នៅចំណុចភូមិសាស្រ្ត ស្រុកឆ្លូង ខេត្តក្រចេះ។
បើតាមសមត្ថកិច្ចបានឲ្យដឹងថា ជនសង្ស័យដែលត្រូវបានឃាត់ខ្លួនបនោះរួមមាន ឈ្មោះ ស៊ិប រ៉សេត ភេទប្រុស អាយុ ៣៣ឆ្នាំ ជនជាតិខ្មែរឥស្លាម មុខរបរមិនពិតប្រាកដ រស់នៅស្រុកស្ទឹងត្រង់ ខេត្តកំពង់ចាម និងឈ្មោះ ស្លេស គាត ភេទប្រុស អាយុ២៥ឆ្នាំ ជនជាតិខ្មែរឥស្លាម មុខរបរមិនពិតប្រាកដ រស់នៅភូមជំនីក ឃុំជំនីក ស្រុកក្រូចឆ្មារ ខេត្តកំពង់ចាម។
វត្ថុតាងដកហូតបានរួមមាន:ម្សៅក្រាមពណ៌សថ្លា (ម៉ាទឹកកក) សង្ស័យជាសារធាតុញៀនចំនួន១២កញ្ចប់,ម៉ូតូចំនួន០១គ្រឿង និងសម្ភារៈស្រាប់សេពមួយចំនួន។បច្ចុប្បន្នជនសង្ស័យ និងវត្ថុតាងមន្ត្រីជំនាញកងរាជអាវុធហត្ថខេត្ត បានកសាងសំណុំរឿងបញ្ជូនទៅតុលាការ ដើម្បីចាត់ការបន្តតាមនីតិវិធី៕
