ក្រសួងធនធានទឹក និងឧតុនិយម៖ ចាប់ពីថ្ងៃនេះ ដល់០៧ ខែវិច្ឆិកាខាងមុខ នឹងមានភ្លៀងធ្លាក់ ពីកម្រិតបង្គួរទៅច្រើន ដោយសារឥទ្ធិពលកូនព្យុះទី២២ ឈ្មោះម៉ាត់តូ
រាជធានីភ្នំពេញ៖ក្រសួងធនធានទឹក និងឧតុនិយម បានចេញសេចក្តីជូនដំណឹង ពីបញ្ហាអាកាសធាតុនៅព្រះរាជាណាចក្រកម្ពុជា ដោយបញ្ជាក់ថា នៅថ្ងៃទី៣១ ខែតុលា ឆ្នាំ២០១៩ ព្យុះទី២២ ឈ្មោះម៉ាត់តូ(MATMO) នឹងធ្វើដំណើរមកដល់ប្រទេសវៀតណាម ហើយនឹងបន្ថយឥតទ្ធិពលរបស់វាទៅជាសម្ពាធទាបសកម្មវិញ។
លក្ខណៈបែបនេះបានធ្វើឲ្យកម្ពុជាចាប់ពីថ្ងៃទី០១ ដល់០៧ ខែវិច្ឆិកាខាងមុខនេះ មានស្ថានភាពដូចខាងក្រោម៖
១-បណ្តារាជធានី ខេត្ត នឹងមានភ្លៀងធ្លាក់រាយប៉ាយជាបន្តបន្ទាប់ ក្នុងនោះតំបន់វាលទំនាបកណ្តាល និងតំបន់មាត់សមុទ្រ នឹងអាចមានភ្លៀងធ្លាក់រាយប៉ាយក្នុងកម្រិតបរិមាណពីបង្គួរទៅច្រើន។
២-បណ្តាខេត្តដទៃទៀត នឹងអាចមានភ្លៀងធ្លាក់រាយប៉ាយ នៅក្នុងកម្រិតបរិមាណពីមធ្យមទៅបង្គួរ។
ដូច្នេះក្រសួងធនធានទឹក និងឧតុនិយម បានអំពាវនាវ ដល់បងប្អូនប្រជាពលរដ្ឋ មានការប្រុងប្រយ័ត្ន ចំពោះគ្រោះថ្នាក់នានា ដែលបង្កដោយបាតុភូតអាកាសធាតុនេះ៕
