ឯកឧត្តមអគ្គបណ្ឌិត សភាចារ្យអូន ពន្ធ័មុនីរ័ត្ន អញ្ជើញជាអធិបតីក្នុងពិធី ដាំដើមក្រវ៉ាន់ជានិមិត្តរូប នៅបរិវេណខាងមុខ ប្រាសាទអង្គរវត្ត
ខេត្តសៀមរាប៖កាលពីព្រឹកថ្ងៃទី០៨ ខែតុលា ឆ្នាំ២០១៩ ឯកឧត្តមអគ្គបណ្ឌិត សភាចារ្យ អូន ពន្ធ័មុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញជាអធិបតីក្នុងពិធីដាំដើមឈើផ្កាក្រវ៉ាន់ជានិមិត្តរូបចំនួន៥០០ដើម នៅលើផ្ទៃដីចំនួន៨០អា នៅបរិវេណខាងមុខប្រាសាទអង្គរវត្ត ផ្នែកខាងលិច ជាមួយបណ្ដារដ្ឋមន្ត្រី ឧត្តមមន្ត្រីអាស៊ាន អគ្គលេខាធិការអាស៊ាន អាជ្ញាធរដែនដី ឧទ្យាននុរក្ស ក្រុមការងាររៀបចំកិច្ចប្រជុំអាស៊ាន យុវជនកាយរិទ្ធ យុវជនស.ស.យ.កខេត្ត ជាច្រើននាក់ផងដែរ។
សូមបញ្ជាក់ផងដែរថា៖កម្មវិធីដាំដើមក្រវ៉ាន់ នៅលើទឹកដីអង្គរ ខេត្តសៀមរាបនេះ គឺជាគំនិតផ្ដួចផ្ដើមរបស់ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ក្នុងគោលបំណង ចង់រំលឹកឡើងវិញ និងបង្ហាញនូវរុក្ខជាតិ ឬបុប្ផា សម្គាល់នៅភូមិសាស្ត្រ ទីតាំង ឬខេត្ត ដូចក្នុងអត្ថន័យសំឡេងមរតកដើមរបស់អធិរាជសំឡេងមាស លោក ស៊ិន ស៊ីសាមុត បានបង្ហាញតាមរយៈបទចម្រៀង ក្រវ៉ាន់សៀមរាប រំដួលក្រចេះ និងចំប៉ាបាត់ដំបងជាដើម។
ជាងនេះទៅទៀត កម្មវិធីនេះ ក៏ជាការជម្រុញ និងលើកកម្ពស់ទស្សនវិស័យClean and Green Asean គឺអាស៊ានស្អាត និងបៃតងផងដែរ៕
