ឯកឧត្តមអភិបាលខេត្តកំពត ដឹកនាំកិច្ចប្រជុំគណៈកម្មការ និងអនុគណៈកម្មការខេត្ត រៀបចំបុណ្យសមុទ្រលើកទី៨ ជុំទី២ ឆ្នាំ២០១៩
ខេត្តកំពត៖នាព្រឹកថ្ងៃព្រហស្បតិ៍ ១២ កើត ខែ អស្សុជ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១០ខែតុលា ឆ្នាំ២០១៩ ឯកឧត្តម ជាវ តាយ អភិបាល នៃគណៈអភិបាលខេត្តកំពត បានដឹកនាំកិច្ចប្រជុំគណៈកម្មការ និងអនុគណៈកម្មការខេត្ត រៀបចំបុណ្យសមុទ្រលើកទី៨ ជុំទី២ ឆ្នាំ២០១៩ខាងមុខនេះ។
ក្នុងកិច្ចប្រជុំនាពេលនេះ មានការអញ្ជើញចូលរួមពីឯកឧត្តម លោកជំទាវអភិបាលរងខេត្ត និងជាប្រធានអនុគណៈកម្មការរៀបចំបុណ្យសមុទ្រ លោកស្នងការនគរបាលដ្ឋានខេត្ត លោកបញ្ជាការកងរាជអាវុធហត្ថខេត្ត លោកមេបញ្ជាការតំបន់ប្រតិបត្តិការសឹករងកំពត លោក លោកស្រីនាយក នាយករងរដ្ឋបាលសាលាខេត្ត លោកប្រធានមូលដ្ឋានសមុទ្រ ទីបញ្ជាការជួរមុខ និងនាយកដ្ឋាននគរបាលព្រំដែនទឹក លោក លោកស្រីប្រធានមន្ទីរ អង្គភាពជំនាញជុំវិញខេត្ត លោក លោកស្រីនាយកទីចាត់ការ និងអង្គភាពចំណុះសាលាខេត្តសរុបចំនួន៩៩នាក់។
ក្នុងឱកាសនោះឯកឧត្តមអភិបាលខេត្តបានមានប្រសាសន៍ណែនាំដែលមានដូចខាងក្រោម៖
១-ស្នើលោកស្នងការនគរបាលខេត្ត ទំនាក់ទំនងជាមួយស្នងការនគរបាលរាជធានីភ្នំពេញ ក្នុងការខ្ចីរថយន្តស្ទូច ដើម្បីត្រៀមបង្ការក្នុងអំឡុងពិធីបុណ្យសមុទ្រខាងមុខនេះ។
២-ស្នើលោកប្រធានមន្ទីរព័ត៌មាន រៀបចំអត្ថបទជូនដល់អ្នកសារព័ត៌មាន និងវិទ្យុ ដើម្បីផ្សព្វផ្សាយអំពីព្រឹត្តិការណ៍បុណ្យសមុទ្រ នៅខេត្តកំពតឲ្យបានទូលំទូលាយ។
៣-ស្នើលោកប្រធានមន្ទីរសាធារណការ និងដឹកជញ្ជូនខេត្ត ជួយសម្រួលដល់ហេដ្ឋារចនាសម្ព័ន្ធនៅក្នុងខេត្ត និងត្រូវកំណត់ពេលជួបពិភាក្សាជាមួយ អ្នកវិនិយោគិនចិន ដែលកំពុងធ្វើផ្លូវជាតិលេខ៣ ដើម្បីពន្លឿនការស្ថាបនាផ្លូវ៕
