សង្ស័យថ្នាំញៀន បានធ្វើឲ្យបុរសម្នាក់ ទាញពូថៅកាប់២នាក់ឪពុក-កូន បណ្តាលឲ្យឪពុកស្លាប់ កូនរងរបួសធ្ងន់ ស្រុកស្ទោង
ខេត្តកំពង់ធំ៖ឪពុកស្លាប់ កូនរងរបួសធ្ងន់ បញ្ជូនសង្គ្រោះនៅឯមន្ទីពេទ្យ ដោយសារបុរសវ័យ៣០ឆ្នាំម្នាក់បានទាញពូថៅកាប់ប្រហា ខណៈដែលជនរងគ្រោះកំពុងអង្គុយលាងដៃ និងដុសធ្មេញនៅអែបពាងទឹកក្រោយផ្ទះ។
សូមជំរាបដែរថា៖ករណីនេះបានកើតឡើងកាលពីវេលាម៉ោង៧និង៣០នាទីព្រឹក ថ្ងៃទី០២ ខែតុលា ឆ្នាំ២០១៩ ស្ថិតនៅក្នុងភូមិងួនសៀម ឃុំកំពង់ចិនត្បូង ស្រុកស្ទោង ខេត្តកំពង់ធំ។
បើតាមប្រភពព័ត៌មានបានឲ្យដឹងថា៖ជនសង្ស័យមានឈ្មោះ ម៉ៅ ម៉ៃ ភេទប្រុស អាយុ៣០ឆ្នាំ មុខរបរមិនពិតប្រាកដ។ចំណែកជនរងគ្រោះមានឈ្មោះ ទិត រិន ភេទប្រុស អាយុ៤៣ឆ្នាំ ត្រូវជនល្មើសកាប់ចំនួន៩កន្លែងបណ្តាលឲ្យស្លាប់ក្នុងថ្លុកឈាម និងជនរងគ្រោះម្នាក់ទៀតឈ្មោះ រិន វិត ភេទប្រុសអាយុ១៨ឆ្នាំ ជាកូនរបួសលើភ្នែកគោលខាងឆ្វេង។
ក្រោយកើតហេតុសមត្ថកិច្ចបានចុះធ្វើការស្រាវជ្រាវរហូតឈានដល់ការចាប់ឃាត់ខ្លួនជនសង្ស័យ និងដកហូតបាននូវវត្ថុតាងពូថៅ១ផងដែរ។
សមត្ថកិច្ចបន្តថា៖មុនពេលកើតហេតុជនសង្ស័យបានមកអង្គុយ លេងជាមួយជនរងគ្រោះ នៅក្រោមផ្ទះរបស់ជនរងគ្រោះ មួយសន្ទុះក្រោយមកម្តាយជនសង្ស័យបានមកស្តីបន្ទោសឲ្យជនសង្ស័យ រួចក៏ដើរចេញទៅបាត់។ចំណែកជនរងគ្រោះក៏ដើរទៅឲ្យចំណីមាន់នៅក្រោយផ្ទះ រួចហើយក៏មកអង្គុយលាងដៃ និងដុសធ្មេញនៅអែបពាងទឹកក្រោយផ្ទះ ស្រាប់តែជនសង្ស័យបានទាញពូថៅក្រោមគ្រែ ដើរទៅកាប់ជនរងគ្រោះជាច្រើនពូថៅ បណ្តាលឲ្យស្លាប់នៅនឹងកន្លែង និងម្នាក់ទៀតរងរបួសធ្ងន់បញ្ជូនទៅសង្គ្រោះនៅឯមន្ទីពេទ្យ។
បើតាមការសន្និដ្ឋានរបស់សមត្ថកិច្ចករណីនេះ សង្ស័យជនដៃដល់បែកថ្នាំញៀន ព្រោះពួកគេពុំមានទំនាស់នឹងគ្នានោះទេ។បច្ចុប្បន្នជនសង្ស័យ ត្រូវបានសមត្ថកិច្ចកំពុងធ្វើការសាកសួរ និងកសាងសំណុំរឿង បញ្ជូនខ្លួនទៅកាន់តុលាការ ដើម្បីចាត់ការបន្តតាមនិតិវិធី។
ដោយឡែកសាកសពជនរងគ្រោះក្រោយពីសមត្ថកិច្ចជំនាញធ្វើកោសល្យវិច័យរួច ប្រគល់ឲ្យសាច់ញាតិក្រុមគ្រួសារ យកទៅធ្វើបុណ្យតាមប្រពៃណី៕
