អុជធូបនៅអាសនៈ ទុកចោល ត្រូវអគ្គីភ័យលេបត្របាក់ អស់ទាំងស្រុង នៅស្រុកពួក
ខេត្តសៀមរាប៖ផ្ទះពលរដ្ឋ១ខ្នងមានទំហំ៦គុណ៧ម៉ែត្រ ជញ្ជាំងក្តារឈើ ប្រក់ក្បឿង និងសម្ភារៈប្រើប្រាស់ក្នុងផ្ទះត្រូវអគ្គីភ័យឆាបឆេះអស់ទាំងស្រុង ដោយសារកូនប្រុសច្បងអុជធូបនៅអាសនៈ ទុកចោល ខណ:ឪពុកម្តាយរវល់ទៅធ្វើការនៅខេត្តព្រះវិហារ អស់រយៈពេល១ខែហើយ ដោយទុកឲ្យកូនៗរបស់គាត់ចំនួន៣នាក់ នៅចាំផ្ទះ។
ហេតុការណ៍ដែលបង្កឲ្យមានការភ្ញាក់ផ្អើលនេះកើតឡើងកាលពីវេលាម៉ោងជាង០៧ព្រឹក ថ្ងៃទី៣១ ខែតុលា ឆ្នាំ២០១៩ ស្ថិតនៅភូមិគោកដូង ឃុំត្រីញ័រ ស្រុកពួក ខេត្តសៀមរាប។
ពាក់ពន្ឋ័ករណីខាងលើនេះបើតាមលោកវរសេនីយ៍ឯក ទេព ពុំសែន អធិការនគរបាលស្រុកពួក បានឲ្យដឹងថា ម្ចាស់ផ្ទះរងគ្រោះមានឈ្មោះ ឈឿយ ឈី ភេទប្រុស អាយុ៤៤ឆ្នាំ មុខរបរ កសិករ ប្រពន្ធឈ្មោះ ពាត់ ថា អាយុ៤៨ឆ្នាំ មុខរបរ កសិករ មានទីលំនៅភូមិ ឃុំកើតហេតុខាងលើ។
លោកអធិការបន្តថា មុនពេលកើតហេតុឈ្មោះ ឈី ឆាន ភេទប្រុស អាយុ១៨ឆ្នាំ ត្រូវជាកូនច្បងបង្កើតរបស់ម្ចាស់ផ្ទះរងគ្រោះបានយកធូបចំនួន១២សសៃ មកអុចនៅកន្លែងអាសនៈរបស់ម្តាយខាងលើផ្ទះហើយចាក់សោរ រួចនាំប្អូន០២នាក់ទៀតទៅលេងផ្ទះអ្នកជិតខាងមួយសន្ទុះក្រោយមកក៏ស្រាប់តែមានផ្សែងហ៊ុយ ចេញពីក្នុងផ្ទះ ហើយបានរត់ទៅរកអោយគេជួយ តែអកុសល្យភ្លើងបានឆេះខ្លាំងទៅៗ ដោយមិនអាចគ្រប់គ្រងបានរហូតឆេះអស់ទាំងស្រុងតែម្តង៕