បុរសម្នាក់ចងក ធ្វើអត្តឃាតខ្លួនឯង នៅលើដើមស្តៅ ស្រុកបាណន់ មិនដឹងមូលហេតុ
ខេត្តបាត់ដំបង៖កាលពីវេលាម៉ោងប្រមាណ៥ទាបភ្លឺ ថ្ងៃព្រហស្បតិ៍ ៤កើត ខែកត្តិក ឆ្នាំកុរ ឯកស័ក ពស២៥៦៣ត្រូវនឹងថ្ងៃទី៣១ ខែតុលា ឆ្នាំ២០១៩ មានការភ្ញាក់ផ្ញើលមួយបានកើតឡើងដោយពលរដ្ឋបានប្រជាពលរដ្ឋបានប្រទះឃើញសាកសពបុរសម្នាក់ចងកធ្វើអត្តឃាត នៅលើដើមស្តៅ ក្នុងដីស្រែ របស់ឈ្មោះ សុខ ឡាន់ ភេទស្រី អាយុ៦៥ឆ្នាំ ចម្ងាយប្រមាណ១៥០ម៉ែត្រពីក្រោយផ្ទះ ស្ថិតនៅក្រុមទី៧ ភូមិព្រះស្រែ ឃុំស្នឹង ស្រុកបាណន់ ខេត្តបាត់ដំបង។
បើតាមប្រភពព័ត៌មានបានឲ្យដឹងថា ជនរងគ្រោះមានឈ្មោះ សុំ មករា ហៅញ៉ាញ់ ភេទប្រុស អាយុ២៤ឆ្នាំ មុខរបរធ្វើស្រែ រស់នៅភូមិ ឃុំកើតហេតុ។
បើយោងតាមការបំភ្លឺរបស់ឈ្មោះ ប៉ាក សុខុម ភេទប្រុស អាយុ៤៨ឆ្នាំ រស់នៅភូមិ ឃុំកើតហេតុបានប្រាប់ឲ្យដឹងថា នៅវេលាខាងលើឈ្មោះ រស់ រី ភេទស្រី រស់នៅភូមិ ឃុំជាមួយគ្នាបានប្រាប់ខ្លួនថា ឲ្យជួយ មើលនៅវាលស្រែឃើញមនុស្សឬទីងមោង ពេលដែលខ្លួនមើលឃើញហើយប្រាប់ថា មិនមែនទីងមោងទេ គឺមនុស្ស ភ្លាមនោះក៏នាំគ្នាទៅមើលទើបស្គាល់ឈ្មោះសុំ មករា ហៅញ៉ាញ់ ដែលត្រូវជាក្មួយបង្កើតរបស់ខ្លួនបានចងក នៅលើដើមស្តៅហើយ ក៏នាំគ្នាស្រាយទំលាក់ចុះមកដើម្បីជួយសង្រ្គោះក្រែងមានសង្ឃឹមរស់វិញ ដោយសពនេះនៅទន់នៅពីព្រោះទើបតែបាត់វេលាម៉ោងប្រហែល៤ជិតភ្លឺ។
ប្រភពដដែរបញ្ជាក់ថា៖ពីមុនជនរងគ្រោះធ្លាប់ប្រើប្រាស់គ្រឿងញៀន ដោយឪពុកធ្លាប់យកទៅពេទ្យពេលនោះពេទ្យបានបញ្ជាក់ប្រាប់ថា ប្រើប្រាស់គ្រឿងញៀនច្រើនទើបបណ្តាលអោយប៉ះពាល់ខួរក្បាល ហើយខ្លួននិងឪពុកម្តាយធ្លាប់ហាមឃាត់ និងអបរំដែរ ប៉ុន្តែវាមិនស្តាប់ហើយលួចជក់ថ្នាំញៀនរហូតដល់ខូចខួរក្បាល។
ក្រោយកើតហេតុភ្លាមសមត្ថកិច្ចជំនាញបានចុះធ្វើកោសល្យវិច្ច័ ជាលទ្ធផលឃើញថា សពពិតជាធ្វើអត្តឃាត ចងកដោយខ្លួនឯង រួចប្រគល់ឲ្យក្រុមគ្រួសារយកធ្វើបុណ្យតាមប្រពៃណី៕